Ole Eek in de Wallanlagen

Boomsöken

vun Anke Nissen


Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.

Uns Fründ Gerd is en Boomsöker. He kiekt sik üm na schöne Bööm, olle Bööm, rare Bööm, na besünners hoge Bööm, besünners dicke Bööm...

Faken fraagt he mienen leven Mann, wat he nich mitkamen will. Dat Meten vun den Ümfang vun enen Boom is för een alleen beten wat swoor. Un denn treckt de beiden Mannslüüd los un kaamt mehrst hooch beglückt weller trüch; denn enerwegens wat vun Interesse findt se jümmers. Nu aver hebbt de beiden mi inlaadt, ik sall mitkamen un ik sall mienen Photoapparat mitbringen. Also goot.

Beten wat gespannt seet ich achtern in't Auto, as wi den Möhlendamm in Lübeck anstüürn. Wi parken, lepen na de Wallanlagen un klattern rup. Baven steiht en uroll Eek. To'n Erbarmen süht se ut. So'n beten as so'n Boom-Torso. Un doch driggt se poor Äst un Telgen, de Knospen ansett hebbt, de grönen wüllt un warrt. De beiden Mannslüüd hebbt den Ümfang meten, un mit en höltern — süvst warkelt — Dree-Eck hebbt se faststellt, wo hooch de Boom is. Denn sünd wi weller dalstegen un mien leef Mann hett sik — o Wunner — up mi beten wat stützt.


Gewaltige Eek in Genin

Denn aver entdecken de beiden en stattlich Boom — ik glööv, en Böök — un se füngen weller mit dat Meten an. Mi hebbt an'n besten all de velen blagen Krokusse gefullen, de üm dissen Boom rüm blöhen.

Uns nächst Teel weer de Freedhoff in Genin. Dor hebbt wi enen groten Ekenboom funnen. De Mannslüüd hebbt meten un denn hebbt wi noch enen funnen un noch enen un denn stünnen wi vör en würklich gigantisch Eek. Knorrig, groot, dick — eenfach överwältigen, en Stieleek (Quercus robur). De Mannslüüd füngen mit't Meten an un denn strahl uns Fründ Gerd. Dat Maßband wies över 7 Meter!


Krankenhaus Süd, Blootböök

Ik heff mi up de Bank sett, de sik an de warme Backsteinwand vun de olle Kirch anlehn, un dor hett man mi vertellt, dat in een vun disse veer Eken de Brutstell vun en besünnern un raren Käfer is, vun den Heldbockkäfer, ok Grote Ekenbockkäfer. Disse Aart is vun't Utstarven bedrauht. De Käfer warrt bit över fief cm groot, wi hebbt aver keen sehn. — De Käfer leevt bloots in ole Eken un opleevst in solk, de al en lütten Schaden weghebbt. He drinkt ehrn Boomsaft un fritt sik dorto ok in den Boom. So schädigt he den Boom oftins noch mehr un gellt dorwegen ok as Schädling. Dat is en echte Gewetensfraag: Wüllt wi de olen Eken oder den Käfer schulen? Wiel de Käfer as Aart bedrauht is un de Eek nich, geiht sien Schuul vör.


Dörpslinn in Niederbüssau

Wi sünd denn över würklich malerisch Weeg na Niederbüssau föhrt, un ok dor wörr en oll Boom, ene Linde, utmeten. Dat sehg ut, as wörr en Deert sien Tohuus in dissen Boom hebben. He harr ünnen, direkt an de Eerd, en höhlenähnlich Ingang — so keem uns dat vör.

Disse Dörpslinde is so üm un bi 270 Johr olt. Ünner ehr hebbt uns Vöröllern Gericht hollen (Tilia-Gerichte) över Diebe un Bedreger, man ok över Mörder. Un de hebbt se denn glieks, wenn dat Urdeel "schuldig" sä, in den Boom upbummelt.

An'n "Krummesser Boom" sull dat enen bannig ollen Appelboom geven, so harrn wi höört. Wi fragen en beten rüm un landen toletzt in'n Goorn vun Heinz Egleder. Nie heff ik enen schönern Goorn sehen, enen Goorn, de so wat vun wild un sowat vun romantisch is. De Goorn smitt di glatt üm, he is "umwerfend", as de Hoochdüütschen seggt.


Egleder Marzipan-Appel

Un de Mann, den disse Goorn tohöört, weet so veel över sienen Goorn un vör allen över siene Appelbööm to vertellen. Spannend! He hett bannig ole Appelbööm un he weet över elkeen Boom wann he etwa plant worrn is, över de Boomgeschicht, över de Sorten, över de Namen.

He hett uns enen Rosen-Appelboom wiest un enen Marzipan-Appelboom. He hett aver ok en Ort Appel-Plantage, in de he sik üm dat Kultiveern vun olle heimisch Sorten kümmert.

Ik harr dissen Mann noch stünnenlang tohöörn kunnt, man dat wörr so bilütten düüster. Wi hebbt noch en Adschüß-Photo schaten un denn Tschüß seggt.


Adjüs-Foto ünner Herrn Egleders Marzipanappel

Wi kemen up unsen Trüchweg an't Krankenhuus Süd vorbi — ik weet ja, dat heet nu "Sana-Klinik" —, un dor sünd wi noch gau anhollen un hebbt en olle Blootböök utmeten. To'n Photographeern weer't meist al 'n beten düüster, un kolt weer't ok, dat weer nämlich eerst de 11. März.

Ik kann nu verstahn, dat de beiden Mannslüüd vun ehre lang anduurn Boom-Söök-Touren jümmers so tofreden — so beglückt — na Huus kaamt. Mi hett't ok gefullen.


26.7.2015


na baven