Dei eierste NASA-Besatzung för bemannte Ruumfohrtüge van Boeing un SpaceX


Amerikao hett beslaoten: Sluss mit dei Afhängigkeit van dei Russen un van Baikonur! Dat CST-100 Starliner-Ruumschipp, ein amerikaonsche Ruumfähr. Bild: NASA/Robert Markowitz. Klick up tau'n Vergröttern!

van Ludgerd Lüske


An'n 03. August 2018 geef dei Nasa bekannt, wecker Astronauten an Bord van dei neien amerikaonischken Weltruum- un Raketensysteme starten schäöllt. Dat werd dei eiersten Starts van dei USA mit Menschken siet 2011, siet dat Enn vun't Space Shuttle. Siet dei Tied gääv dat kein amerikaonsche Ruumfähr mehr, bloots dei Russen flügg in't All — dat schall nu anners warrn!

Nägen US-Astronauten wörden indeilt för dei eiersten Test-Missionen, acht kaomet van dei Nasa, ein Astronaut kummp van Boing. Dei schäöllt dat Boing CST-100 Starliner un dat SpaceX Crew Dragon testen, tausaome mit dat Commercial Crew Programm van dei Nasa.

Dat Ruumschipp schall van dei Cape Canaveral AFS Launch Complex 41 starten un kann 60 Stünnen lang autonom fleigen. Dat Anstüerten van Ruumstationen schall dat Ruumfohrtüg binnen 24 Stünnen nao den Start schaffen. Et giff eine Reserve van 24 Stünnen. Bit tau 210 Daoge kann ein CST-100 Starliner andocket an eine Ruumstation in'n Weltruum bliewen. Bi dei Landung giff et Bremsfallscherme. Dat Upsetten an Land werd dör Airbags afffeddert. Dat Landen in'n Ozean schall uck gaohn. För 10 Insätze is dei Apparaot plaont. Dat Servicemodul vergleiht bi dei Landeaktion un man et mutt för jeden Insatz nei bawen.


Dragon 2 van SpaceX, nich ein amerikaonsche Alternative tau dei Sojus-Kapseln.
Bild: SpaceX. Klick up tau'n Vergröttern!

Dragon 2 werd van SpaceX bawed för bemannte Missionen. Säben Astronauten off ein Mischken ut Fracht un Astronauten kann Dragon 2 in den eerdnaohen Ümloop bringen.

Dat öffentlick-privaote Tausomewarken is dei Anfang van eine neie Tied in dei bemannte Ruumfohrt. Dei Nasa arbeitet mit Boing un SpaceX tausaome. Dorbi bawet disse Ünnernähmen ehre Systeme up, entwicklet un testet dei. So schall dei Transport in den eerdnaohen Ümloop seker un kostengünstig wern.

Dei Boeing CST-100 Starliner schall up eine United Launch Alliance Atlas V-Rakete van den Space Launch Complex 41 bi Cape Canaveral Air Force Station in Florida starten. Blots ein poor Meilen an dei Küste hoch schall dei SpaceX Crew Dragon up eine Falcon 9 Rakete starten. Dei Startstäe is dei historischke Startkomplex 39A van dat NASA Kennedy Space Center.


Dei Nasa-Astronaut Eric Boe wörd indeilt för den eiersten Flug mit den Boeing CST-100 Starliner. Bild: Nasa/ Bill Ingalls

Dei eiersten Astronauten, dei mit den Starliner van Boeing startet, sünd Eric Boe van dei Nasa, Chris Ferguson van Boeing un Nicole Mann van dei Nasa.

Boe warkde in dei leßten drei Johre tausaome mit Boing un SpaceX. Hei was ein Deil van dei kommerzielle Mannschkup bi dei Astronauten.


Leßte Kommandant van't Space Shuttle, nu wedder dorbi, wenn dei USA wedder eigene Ruumfähren buut: Dei Boeing-Astronaut Christopher J. Ferguson wörd indeilt för den eiersten Flug mit den Boeing CST-100 Starliner. Bild: Nasa/ Bill Ingalls

Dei Nasa-Astronautin Nicole Mann wörd indeilt för den eiersten Flug mit den Boeing CST-100 Starliner. Bild: Nasa/ Bill Ingalls

Ferguson, dei Kommandant van dei leßte Space Shuttle-Mission, warkede as ein üppsten Mann mit bi dat Boeing CST-100 Starliner-Programm.

Dei eiersten Astronauten, dei mit den SpaceX Crew Dragon starten schäöllt, sünd Bob Behnken un Doug Hurley van dei Nasa.

Tauleßte flög Behnken mit dat Space Shuttle. "Dat Shuttle wörd äöwer Johrteihnte weg upbawed, bit wi dei Gelägenheit kregen, dormit tau fleigen. Et geff dor binnen bold 3000 Schalters. Wi sünd dankbor, dat dit neie Fohrtüg, womit wi fleigen schäöllt, ein bäten mehr automatischk flügg un wat minner Knipsers hätt."


Beste Stimmung: Dei Nasa-Astronauten Bob Behnken un Doug Hurley wörden indeilt för den eiersten Flug mit den SpaceX Crew Dragon. Bild: Nasa / Bill Ingalls

Hurley, ein Veteraon van twei Ruumflüge, was ein Kampfpilot un Testpilot bi dat US Marine Corps.

Nao dei gaut affloopen Testflüge mit Mannschkup van beide Ruumfohrtüge kann dei Nasa anfangen mit dat Zertifizeiern van dei Ruumfohrtüge un dei Raketensysteme. Dat gellt för staodige Mannschkup-Missionen nao dei Ruumstation. Dei Agentur hätt seß Missionen för jedet Ünnernähmen affschlaoten.


Dei Nasa-Astronaut Josh Cassada wörd indeilt för den eiersten Flug mit den Boeing CST-100 Starliner. Bild: Nasa/ Bill Ingalls

Dei Nasa-Astronauten, dei Boing för ehre eierste Insatzmission taudeilt kreeg, sünd Josh Cassada un dei Veteraon Suni Williams. Cassada flügg siene eierste Mission an Bord van den Boing-Starliner.
Nao ehren Flug an Bord van den Starliner hätt Williams drei Ruumschippe, dat Shuttle, dei Sojus un nu den Starliner flaogen. Ehre Mission schall uck ehre eierste Langtiedmission up dei Ruumstation wern.


Fruens wirket wat besunnener: Dei Nasa-Astronaut Suni Williams
wörd indeilt för den eiersten Flug mit den Boeing CST-100 Starliner.
Bild: Nasa / Bill Ingalls


So wöör Trump sik ok henstelln: Dei Nasa-Astronaut Mike Hopkins wörd indeilt för den eiersten Flug mit den SpaceX Crew Dragon. Bild: Nasa/ Bill Ingalls

Dei Nasa-Astronauten, dei man för dei eierste Operation van SpaceX indeilde, sünd dei Veteraonen Mike Hopkins un Victor Glover.
Hopkins mök 2013 siene eierste Reise nao dei Internationaole Ruumstation. Siene Mission mit SpaceX schall siene tweide Langtiedmission wern. Dorbi forschket hei un demonstereiert Technologie.
Glover startet bi siene eierste Mission nao dei Station van den historischen Nasa Startkomplex 39A, wor dei Astronauten nao den Mond starten dön.


Dei Nasa-Astronaut Victor Glover wörd indeilt för den eiersten Flug mit den SpaceX Crew Dragon. Bild: Nasa/ Bill Ingalls

Annere dortaukaomen Besatzungslüe stüert dei inernationaolen Nasa-Partners läöterhen bi.

Beide Ünnernähmen, Boing un SpaceX, stüert wohrhaft neie Ideen bi dat Entwickeln un Utprobeiern van ehre Systeme bi. Dorümme hätt dei Nasa in'n September 2014 disse beiden Firmen utsöcht.
Dat Trüggekaomen van dei Nasa in dei bemannte US-Ruumfohrt lätt wiss eine robuste, wirtschaftlick starke Ruumfohrtindustrie upkaomen mit einen neien Erfindergeist för dei Taukaomen Generationen.


America first? Maol aftäuven — noch flügg bloots dei Sojus-Kapsel nao dei ISS...
Bild: Nasa / Bill Ingalls. Klick up tau'n Vergröttern!

Bild baoven: Dei eiersten US-Astronauten, dei mit amerikaonischke Ruumfohrtüge van un nao dei Internationaole Ruumstation ISS fleigen schäöllt, winket, naodem man dei an'n Freidag, den 3. August 2018, in dat Johnson Space Center van dei Nasa in Houston, Texas, vörstellde.
Dei Astronauten sünd van lünks nao rechts:
Victor Glover, Mike Hopkins, Bob Behnken, Doug Hurley, Nicole Aunapu Mann, Chris Ferguson, Eric Boe, Josh Cassada und Suni Williams. Dei Agentur geff dei Astronauten den Updrag för dei eiersten Fleigtests un Missionen van dei Boing CST-100 Starliner un dat SpaceX Dragon.


Originaol-Nasa-Artikel: süh hier
SO-Platt: Ludgerd Lüske


8.8.2018


na baven