Toloop vun'n Ratzeborger See, de Uursprung vun'n Amazonas

Mit Azzurro up den Amazonas

vun Antje Heßler


Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.

Azzurro is en aftakeltes Segelboot. Bloots de Rump liggt an enen Steeg vun den "Amazonas des Nordens". So seggt man ok vun de Wakenitz. Se tellt to de schöönsten Flusslandschapen vun Sleswig-Holsteen. De slawisch Naam is Wochniza, wat so veel heet as de Barsch-Fluss.


De unerforschte Wiednis vun'n Amazonas


Twee Missionare fohrt mit Gottvertruun den wilden Fluss rop

De Wakenitz is de natüürlich Afloop vun den Ratzeborger See. In'n Süden vun Lübeck münn fröher de Wakenitz in de Traav. Dat weer so bit to den Kanalbuu vun den Elbe-Lübeck-Kanal üm 1896- 1900. Den Toloop vun de Wakenitz in de Traav hett man dörch enen Damm (Falkendamm) afsparrt. Dordörch staute sik de Wakenitz an't nöördlich Enn to lütte Seen up. De Waterstand wöör na den Dammbuu dörch enen Düker regelt.


Waterpest luert an't Över —...


... un in'n Uurwoold luert noch anner Gefohren


Primitive höltern Anlegger wiest op hin, dat hier Uurinwahners huust

Över lange Strecken is de Wakenitz de Grenz twischen Sleswig-Holsteen un Meckelnborg-Vörpommern. Bit 1989 weer dat ok de innerdüütsche Grenz. Dat Över an de Oostsiet weer Sperrzoon vun de DDR. Dordörch wöör de urwaldortige Boombestand vun Ellernbrüüch un anner Planten un Bööm in den natten un moorigen Grund noch vöran dreven. Vele Planten siedeln sik an. De Wakenitz kreeg den Binaam Amazonas des Nordens!


Düsse willen Deerten sünd angeevlich harmlos för Minschen, man wokeen weet dat wiss?


Deep in'n Uurwoold borgen, bloots över primitive Holtstegels to recken, en Hütt

Up de Wakenitz tummelt sik Segelboote, Ruderboote un Paddelboote. För de Watersportler is dat en lütt Paradies. Blots de Fohrgastscheep dörpt mit Motorkraft föhrn. An't Över gifft dat wunnerbore Villen mit Bootsanlegger un Badestege. Kannst in Sommer fröhmoorns glieks in't Water springen. Ok de Angler weet dat Water vun de Wakenitz as godes Angelreveer to schätzen.


Unbekannte Planten an't Över. Giftig? Fleeschfreten? Wokeen weet?

Mit en Fohrgastschipp sünd wi al öfter up de Wakenitz föhrt. Ümmer wedder hett uns dat urwaldortige Över faszineert. De groten olen Bööm strecken ehr Telgen wiet över dat Water. Witte Seerosen un gele Mummeln keken ut dat gröönlich Water vun den Grund na baven. As lütte gröne Inseln swommen de groten Swimmbläder vun de Seerosen in'n Sommer up dat Water. Dormang leeg verdröögt Astwark. Up de Telgen seten Watervagels un leten ehr Fedderkleed vun de Sünn drögen. Neven uns Fohrgastschipp trock en Swaan mit lütte Kinner siene Bahn. Över uns kreis en Griepvagel. Dat weer ümmer wedder en ganz besünneres Beleevnis.


Doodsmutiges Forscherpoor in ehr lierlüttes Woterfohrtüüch


Warrt ut den Dschungel giftige Pielen flegen?

Un nu wull uns Söhn uns mit "Azzurro" up de Wakenitz lang schippern. Wi sünd beide nich mehr de Jüngsten un harrn meist 'n beten Bammel vör düsse Fohrt. Aver he harr Azzurro extra för uns herricht. Dörch Gestrüpp un Waterplanten balanceern wi up twee Breder na den Anlegger. Dor leeg dat Boot up glieke Hööcht mit den Bootssteeg. Up Azzurro harr he twee Goornstöhl fastmonteert. Weke Kissen legen up de Stöhl. He streck uns sien Hand in de Mööt un wi brukten blots enen Schritt hindaal in dat Boot maken. Denn seten wi al jeder up en Goornstohl. N'beten schaukelt hett dat ja.


De Duft vun Frieheit un Aventüür!


Seltene Deerten...


...de villicht bald vun de Piranhas...


...orr vun gefährliche so nöömte Waterrosen freten warrt


Unermessliche Aartenveelfalt herrscht in düssen Waterdschungel


Eerste Teken vun Zivilisaschoon! Wi kaamt in de Neegde vun en Missioonsstaschoon.

Dat harrn wi aver gau vergeten. Wat kregen wi allens to sehn! An den Steeg swommen junge Aanten dicht an't Boot vörbi. Wi kunnen se meist anfaten. De beiden Öllern passen up. Över de grönen Bläder vun de Seerosen swevten hunnerte vun lütte Libellen.

Un denn güng dat los. Uns Söhn lööste de Tampen vun Azzurro un wriggte langsam vun den Steeg af. Eerst as he dörch dat Grööntüüg weer, güng dat beter vöran. Dörch de Waterpest, en Waterplant, weer de Wakenitz deelwies dull towussen.
Azzurro stüür nu op de Insel Spieringhorst to. In de Meern vun de Wakenitz keem uns dat Fohrgastschipp "Wakenitz" in de Mööt. Bi herrlichen Sünnenschien seten de mehrsten Fohrgäst up dat Böverdeck. As se uns wies wöörn, winken se uns lachend to. So'n Boot as Azzurro mit twee Goornsessel an Bord kregen se nich alle Daag to sehn.


Ut eenfache Natuurmaterialien hebbt de Missionare an't Över Hüüs buut


Unbekannte Vagelaarten gifft dat hier Dusende un Dusende

 

Wi schippern wieder ümmer neeger an't Över vun Spieringhorst lang. Gegenöver leeg de Anlegger Fischerbuden. De Bewahner vun de Insel kunnen blots mit en egen Fähr up Fastland kamen. En anner Gelegenheit gifft dat nich. An de Anlegger stünnen Schiller: "Privat, Anlegen verboten!" In Winter, wenn de Wakenitz tofrooren weer, harrn se oftins groot Möög, na de anner Siet to kamen.


De Uurinwahners leevt noch in primitive Hütten un loopt nakelt.

Ut enen lütten Yachthaven keem uns en Segelboot in de Mööt. Wi hebbt denn bidreiht un sünd üm en Landnees in Richt vun den lütten See schippert. Up de linke Siet vun't Över wöörn wi up verdröögt Astwark enen Fischreiher wies. He dröög sien Fedderkleed in de Sünn. Aver as he uns sehg, flöög he dorvun.

As wi üm de Landnees rümm weern, leeg de Kaninkenbarg vör uns. En grote witte Prachtvilla, en Slott, leeg dor in strahlend Avendsünnenschien. Un dat up den Kaninkenbarg! Wie veel Lüüd wull in dat grote Huus leevt? De mütt sik doch meist verlopen. Oder wahnt dor am Enn en vertövert Prinz?


Mit de Kolonisten keem de Foortschritt

Wi hebbt denn kehrt maakt un sünd ganz tofreden mit unsen Azzurro wedder na den ümwucherten Anlegger vun unsen Söhn schippert. Wedder an Land weer uns vun de unwennte Schaukelee richtig so'n beten swiemelig in'n Kopp. De romantische Wakenitzfohrt warrt wi ni vergeten, se harr uns richtig so'n beten vertövert.


Tschüß, wilde Amazonas!


To'n Anhören hier klicken:

Lesen deit Antje Heßler in holsteiner Platt.

23.9.2012


na baven