Windsegel — Erinnern an en kreativen Minschen

vun Antje Heßler


Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.

All wedder legen överall bunte Annoncen un olle Zeitungen rüm. Welke mit Kunst un allerlei bunten Kram — aver ok de müssen an de Kant bröcht warn. Dat wöör Tied, dat se weg kemen! Wohin dormit? Eerstmal keem dat Oldpapier in en Kist. An neegsten Dag föhren wi mit Auto na enen Parkplatz. Dor weern Container för Papier, ole Plünnen, ole Schooh un Glas.


De Weg langs de Containers...


...föhrt na den Speelplatz an de Oostsee


De Promenaad: Studie in Blaag un Sülver


Een passt op!

Mien Mann söch sik ümmer den Parkplatz direkt an't Water bi de Möwenbadeanstalt ut. Dor kunn man bi de Arbeit so schöön över de Oostsee kieken. Up de Promenaad spazeern Footgänger. Up de Oostsee föhr oftins en groot Schipp vörbi. Bi Sünnenschien güngen wi ok nochmal an't Över. Allerhand Watervagels weern dor to sehn. So harrn wi gliektiedig mit uns Arbeit unsen Spaß!

Direkt neven den Parkplatz weer en Kinnerspeelplatz. Dor weer ümmer Leven. Vör eenige Tied hebbt se up dat Gelänn vun den Speelplatz twee Windmöhlen upstellt. "Kunst an de Oostsee"! De maakt sik goot vör dat blage Water.


De Kinnerspeelplatz mit de Kunstwarken

 


Blick na Stülper Huk

De Kunstwarken heet "Windsegel" un stammt vun den Künstler Andreas Liebelt. Se erinnert aver an den Visionär Dr. Egon Schmitz-Hübsch. He hett siet 2005 frischen Wind na Tramünn bröcht. De ole Vogtei wöör vun em to nieges Leven weckt, hüüt is ganz Tramünn stolt op düt lebennig Stück Geschichte. Egon Schmitz-Hübsch weer de Baas vun de Restaureern. Un ok den "frischen Wind" kannst wöörtlich nehmen: Egon Schmitz-Hübsch hett ok de "WindArt" in't Leven ropen, en Frieluft-Kunstveranstalten, de elkeen Sommer in Tramünn Wind, Kunst un innovative Ideen verbinnen deit. De Kunstwarken bi de Kinnerspeelplatz erinnert uns lebennig doran.


Lebennig as Dänzersche seht de Windsegel ut


An'n Sörmanndamm

Leider müssen de Tramünner sik bald vun düssen ansläägschen Kopp un ungewöhnlichen Minschen verafscheden: Al in Mai 2013 bleev Dr. Egon Schmitz-Hübsch miteens dood. He weer eerst 71 Johr oolt, wat harr he wohl noch allens beschicken kunnt...?


Stülper Huk


31.1.2017

trüch


na baven


na't Flack

na de Startsiet