Woans snackt Sleswig-Holsteen?

En lütt Book heff ik annerletzt kregen, dat gefull mi heel good, un ik much dat kort vörstelln, ok wenn dat keen rein plattdüütsch Book is. Avers en Ur-Plattdüütschen, nüms anners as Karl-Heinz Groth, hett "So snackt Schleswig-Holstein" tosamenstellt un rutbröcht, de Foortsetten vun "So spricht Schleswig-Holstein", völlig to Recht mit en stärker Wicht op Platt (un de annern "Minnerheiten"-Spraken in SH). Ok de Nich-Plattdüütschen snackt bi uns ja en beten Platt in'n Alldag, meist ahn dat se dat weet. Dat Book is also en lütte Bruuksanwiesen för uns Land, perfekt as Gaav an Nieg-Sleswig-Holsteiners, dat se sik utkennt; un liekers is dat noch to kort grepen.

Dat Book kunn ok good heten "Woans warr ik en Noorddüütsche*n?" Denn in all de Snacks un Utdrück, de hier vun A bet Z kort anreten un verklaart warrt, steckt ok en lütte Kultuurföhrer. Wi lehrt de Wötteln vun hütige Gegenstänn, Ümstänn, Bruukwiesen, Wöör un Seggwiesen kennen, de Levensümstänn, ut de se wussen sünd, histoorsche Beropen usw., de hüüt nich mehr so begäng sünd; un jümmers wedder överwältigt uns de grote bildhaftige Utdruckskraft sünnerlich vun de plattdüütsche Spraak. "Dor starvt den Paster sien Katt vun" — en vernichten Urdeel över en minne Leistung. Orr "He smitt mit de Wust na'n Schinken" — in een Bild verklaart, wat en Gambit is — en ringes Opper för en groten strateegschen Vördeel. Dat kann Platt meisterlich. Wokeen Hermann-Winters "Sprachbilder im Plattdeutschen" kennt, weet, wat ik meen. En Deel vun düssen Genuss finnst ok hier.

Dor kann also ok en waschechte Noorddüütsche noch wat an Künn un Achtergrunnweten bi opsnappen — un ok de regionaalen Tungslääg vun uns Platt beter kennenlehrn. Weet Se t.B., wat "Dat sort" heet? Ja, dat ingelsche "it sears" is dormit verwandt! Ik heff dat nich wüsst. Biller gifft dat ok — för de ganz Unbeleckten sünd Boßeln, Förtchen, Schnüsch & Co. mit schöne grote Fotos wiest.

Dat is vergnööglich to lesen, kannst in lütte Portschonen vun snopen, mal hier, mal dor, as bi all solk A-bet-Z-Böker — en echtes Nachtdischbook also. Un dat levert jüst de Portschoon Platt un Platt-Weten, de jedereen hier baven bruukt. Mehr deit ja jümmers good — bruukst bloots bi Plattpartu rinkieken

Dat Book hett 168 Sieden, kost 12 Euro un hett ok en ISBN, avers ik heff keen Lust, dat hier aftotippen. Fraagt Se eenfach in'n Bookhannel!


Marlou Lessing
4.10.2020

trüch


na baven


na't Flack

na de Startsiet