Vun Huusgeister un besünnere Krüüze
Ut dat Leven vun den Bildhauer Johann Reimer Schulz

De Biller laat sik deelwies per Klick vergröttern!

De Lästertung. Klick op to'n Vergröttern!

 

 

 

 

 

De letzten Korfflechter hebbt de letzt Johr drevenen slanken Pietschen vun de Koppweiden all afsneden. Se bruken Flechtmateriaal för Körf un Kiepen. -
Strubblige Köpp hebbt de olen Bööm, meist so an hunnert Johren stahn se all dor. De Stämm hebbt deepe Löcker, uthöhlt veele, krumm wussen as Kröpels, wieldat jümmer wedder jüm de lütte Kroon afsneden wöör. De Bork is an veele Steden upreten, wulstig toheilt.
So stahn se dor an den Landweg dörch de Wischen vun Püggen. Is Harvst, Nevel liggt över dat flache Land. Warrt nich mehr recht hell an'n Dag. Fröh morgens wannert een Minsch dissen Weg, deep in Gedanken versunken. Af un an blifft he stahn un lött den Blick wannern. Dor, wat is dat denn? Ut de Weid kiekt ehm een verhutzelt Gesicht an, groot de Kopp, spaddlig un scheef un krumm de Arms. He gifft sik een Ruck un süht nauer hen. De Hutzelkierl is weg. Bloots ole Äst un Rest vun den Stamm vun de Weid.
Bald harr he dat Belevnis vergeten. Aver een poor Daag later dat sülve Bild. Nu is dat aver mehr so een spaddeldünne Hex mit strähnig lang Hoor.


He mutt dat Uschi vertellen. De kriggt spitze Ohren, un in ehr Ogen hett se so een besünneres Glimmern.

Harr se Liekes belevt?

  Wokeen de beiden kennt, de mutt weten, dat elkeen natüürlicherwies twei Ogen hett, wenn aver een Idee upduukt, denn is dat binah so, as wenn de veer Ogen to twei tosamensmölten. Se seihn nauer tosamen, scharper, fienföhliger. Un wenn se denn lang snackt hebbn, denn kiekt he mit sien Künstlerogen, beriekert dörch dat Tosamenbeleven mit Uschi. De beid sünd schon een goot' Gespann!
De gode Fang. Klick op to'n Vergröttern!

De Makrobiotin. Klick op to'n Vergröttern!

 

Een Deil vun een oles Buurnhuus buut de beiden sik ut dor buten in dat Dörp Püggen üm un bi Lüchow un Dannenbarg in't Wendland. Un dat is nu maal een Eck, wo de olen Dörpslüüd sik mennigeen Spökengeschicht vertellen köönt. Dor gifft dat noch Bepüstern un Bespreken! -
Un eenes Dags gifft sik dat so, dat de Bildhauer mit sienen wat öllren Naver maal een wat längern Snack hett. Vun dit un dat warrt vertellt. Denn faat he sik een Hart un bericht vun de kurioosen Gestalten, de he up den Weg mit de Korfweiden seihn hett. "Ach," antert de Naver, "dat sünd denn woll welk vun de verdreven Huusgeister, de du seihn hest. Du weetst ja sülm, binah all Hüüs sünd hier bi uns renoveert. Ok de Böhns hebbt se utbuut, de Heuböhns un de Koornböhns. Dor hebbt de Huusgeister "rietut" nahmen. Narrns harrn se ehr Rooh. Un wi köönt ja noch wat froh sien, dat se sik in uns olen Korf-Weiden verkropen hebbt. So schütten se uns Dörp jümmer noch.
De gerechte König. Klick op to'n Vergröttern!
Un du hest recht seihn, dat gifft veele ünnerschedliche. Mien Oma hett öftins vun jüm snackt. Naams hebbt se ok. Ik erinner een poor: ‚Hüsing' seggt welk, annre ‚Stetigot', aver ok ‚Gesell', ‚Naver orrer Leev-Naver', ok ‚Katermann' warrt de Geister nöömt.
Dat mit de Hex, dat hest du falsch utdüüdt, Hexen sünd uns Huusgeister nich!"
 

Huusgeist Huu. Klick op to'n Vergröttern!

Dat harr he nu dorvun, de Bildhauer Johann Reimer Schulz ut Püggen in't Wendland. - - Verdrevene Huusgeister harr he up den Wischenweg in de Korfweiden seihn.

 

De ole Fru in'n Ast. Klick op to'n Vergröttern!

Un so een Kopp vun een' Bildhauer hett veel Phantasie. Dor harrn se doch letzt de Stubben vun de olen, ümbraken Barken roodt? Un Bildhauer-Ogen seiht ja veel mehr. De seiht, wat in so'n knorrige Wöttel egenlich insteckt. He sleppte een bannig grootes Stück verdreihtes, knorriges Holt na Huus. In een Eck vun sien Atelier wöör dat eerst maal afleggt. De knorrig Wöttel lööt ehm aver nich in Rooh. Se snackte jümmer wedder mit ehm. Un dor sehg he ünner de Bork, dor sehg he sienen eersten Huusgeist.
Huusgeist mit Pogg. Klick op to'n Vergröttern!
Gor nich lang, dor hüngen un stünnen in sien Warksteed een poor Huusgeister. Wenn dat aver so goode Maten sünd, dacht he sik, sogoor lustige Maten, denn warr ik se wat bunt anmalen. Dacht un doon!
Uschi weer begeistert, wat "Bobbie", so nöömt se ehm, dor tostann bröcht harr. - Wedder snackten de beid lang över dat, wat för uns Öllervadders un Öllermudders grootes Bedüden harr.
Uns Huusgeist: Haas  
Uns Huusgeist: Uhl

Ja, un up wat verslungen Weeg is so een Huusgeist nu bi uns in Goorn ok ankamen. De Bildhauer Johann Reimer Schulz hett ehm för mi un uns Huus ut een Stück Stamm vun enen olen Lindenboom maakt. Bobbie maakt nich bloots Huusgeister, bi ehm staht Katten mit'n Fisch in de Poten, Uhlen Uns Huusgeist: De fründliche Grüvlermit Hörns, Slangen, de een in enen Boom hangen kann. He hett en groote Phantasie.

Uns Huusgeist: Vagel un Bloom

Un Bobbie kann best mit Kinner ümgahn. Woso de Pastorsche Zingel ut Ottensen mit ehm tosamenkamen is, dat weit ik nich. Villicht vun den Totem-Pahl an't Altonaer Över, den he tosamen mit Kinner 1999 maakt hett? De Bildhauer maakt veel mit Lüüd tosamen, de Kinner bistaht. Dor kunn mennigeen vun de "Profis" sik een Bispill an nehmen. De Altonaer Totempahl

Dat Ottenser Krüüz. Klick op to'n Vergröttern!

 

De Luckauer Kark

Beid, de Künstler un de Pastorsche, hebbt veel snackt, ok, wat uns Religioon vull vun Biller is. Mit Ünnerstütten vun de Pastoors un de Karkenvörstänn hett de Bildhauer Schulz tosamen mit Kinner in de beeden letzten Johrn twei groote Holtkrüüze upricht. Vun dat een vertellt wi in "Dat Ottensener Krüüz", un vun dat anner will ik nu berichten.
Bobbi warkt - hier in Ottensen
 
Dat tweite Krüüz steiht siet Juni 2002 up den Karkhoff vun Luckau in't Wendland.
Lüüd snackt tosamen. Un dat is man goot so. Bobbie hett denn woll maal de Pastorsche Hülsmann vun de Karkengemeend Bülitz-Zeetze vun dat Ottensener Krüüz vertellt. Een Foto kunn he ehr ok wiesen.
Un de hett dat de Jungs un Deerns vun ehr Gemeend vertellt. De weern glieks Füür un Flamm. Un wo veel Biller jüm infüllt! De schöön Schöppung müßt afbillt warrn mit Blomen un Bööm, Vagels un Feller, Sommervagels un Fisch, Gesichter vun Minschen.
Aver ok ut de Bibel müßt wat to seihn sien: De Arche Noah, een Duuv mit een Blatt vun'n Olivenboom, een groot Regenbogen, een Broot un twee Glöös mit Wien.
 
Dat Luckauer Fredenskrüüz. Klick op to'n Vergröttern!

As denn de Karkenvörstand ok dorför weer, kunnen de Kinner ünner Anwiesen vun Johann Reimer Schulz an't Wark gahn.
"Veer Meter is uns Krüüz hooch, un wi hebbt binah allens alleen maakt!" kunnen de Kinner denn seggen, as dat Krüüz trecht weer.

"Een Predigt is uns Krüüz, een Predigt ahn Wöör!" sä Pastorsche Hülsmann, as se un de Kinner dat Krüüz de Gemeend in een Fierstunn wiesten.
Nu steiht dat Krüüz dor in Luckau an de Karkhoffsmuur, lücht wiet över Wischen un Feller bit hen na de Kimm un mennigeen blifft stahn un warrt nadenkern.

Reimer Schulz maakt een Paus
De Bildhauer Johann Reimer Schulz maakt veel mehr as disse twei Krüüze in Ottensen un Luckau. Annerletzt harr he een Utstellen in dat Ole Tollhuus in Herrenborg bi Lübeck. Veele Lüüd keemen, wat se seihn kunnen, wat een Bildhauer, de een groot Hart för Kinner hett, de mit de Natuur un de Religioon levt, sien Mitminschen schenken un dat Leven rieker maken kann.

Wokeen Lust hett, Bobbie un anner Künstler in't Wendland to drepen, de schull man elkeen Johr twüschen Himmelfohrt un Pingsten de "Kulturelle Landpartie" in'n Kreis Lüchow-Dannenbarg besöken. Un wenn een blots maal mit den Bildhauer Johann Reimer Schulz tosamenkamen will, de kann mi dat ünner de E-Mail-Adress witzke@marless.de seggen. Ik sorg denn dorför, dat Bobbie, wenn he Tiet hett, de Besöker inlaadt.


Hu un Buh. Klick op to'n Vergröttern!

Besöker vun de "Landpartie" köönt in't Internet lesen:
WUNDERPUNKTE IM WENDLAND - Kulturelle Landpartie
Wir laden Sie herzlich zur nächsten Kulturellen Landpartie vom 29. Mai bis 9. Juni 2003 ein.
Weitere Informationen erhalten Sie bei:
feffa e.V.
Lüneburger Str. 18
29451 Dannenberg
fon 05861-988313
email: feffa@t-online.de
Homepage: www.kulturelle-landpartie.de

Rudi Witzke

5.1.2003

trüch


na baven


na't Flack

na de Startsiet