Notizen ut'n Saatmaand



Foto: Jenny Johnson

se slaapt nich, seht dör senkte leder
in ehre welt, en tempeldanz
vun steen, vun borgen lotusbläder
in jümmers unsichtbore nacht,
un ehre seelen lööst sik ganz
vun eer un boom, in den se stickt,
ehr flünken reegt sik luutlos, sacht,
wenn se ut sicht un sinnen flüggt.


de lucht liggt still un sünnensatt.
uns seelenadern tekent swatt
dor dat geheemnis, dat se hollt:
uns' labyrinth, uns' düüstern woold,
in den dör glanz un sünnenglast
bedrauhlich borgen märken wasst.


 

de annerswelt, en oozeaan,
an'n grund twee tweescheneken stahn
un bavenhen in't hoge wischt
en anner wirklichkeit ehr gischt.


blatt üm blatt weiht
ut de pappel ehr
licht hööfd

jümmer klorer warrt
ehr geäst
de heven
dorachter


Fotos un Texte: Marlou Lessing
mehr dorvun: hier

Mit de Anschaffung vun en lütte Digitaalkamera heff ik anfungen, in'n Alldag un bi't Rümströmern in min holsteensche Heimaat eenfache Biller to knipsen vun Ansichten, de mi opfullen, un mit lütte Versen dorbi to seggen, wat mi anspreken dä. In elk Maand kemen poor tosamen. Op Plattpartu bringt wi ehr mit en halv Johr Tiedünnnerscheed rut. Dat is Afsicht: Wat nu is, hebbt wi vör Oogen; man Biller un Versen schallt erinnern an dat, wat us nu feern is, un an de Annershaftigkeit vun'e Natuur in'n Johrsverloop.
Marlou Lessing


trüch


na baven


na't Flack

na de Startsiet