Notizen ut'n Maimaand


de borrn is swaar,
de bööm sünd seek.
as kunn he ehr verslingen,
so truut se noch den freden nich
un hollt sik vörsichtig un licht,
un tögern wasst, liek feenhaar,
ehr bläder gröön un week.


du lütte jung
mit lange tung,
versonnen kiekst
un lickst
de unsichtbore sooß,
de smeckt so schöön...
man blooß
in den momang
hett in den hogen toorn
dornröschen in de spindel piekst.
da güng de tied verloorn.
nu lickst du lang,
noch hunnert johren lang
in steen.


dat land is överswemmt vun lent. de wogen
sünd över allens togen,
un wi kiekt unsen himmel an
vun'n grund vun enen oozeaan.


Fotos un Texte: Marlou Lessing
mehr dorvun: hier

Mit de Anschaffung vun en lütte Digitaalkamera heff ik anfungen, in'n Alldag un bi't Rümströmern in min holsteensche Heimaat eenfache Biller to knipsen vun Ansichten, de mi opfullen, un mit lütte Versen dorbi to seggen, wat mi anspreken dä. In elk Maand kemen poor tosamen. Op Plattpartu bringt wi ehr mit en halv Johr Tiedünnnerscheed rut. Dat is Afsicht: Wat nu is, hebbt wi vör Oogen; man Biller un Versen schallt erinnern an dat, wat us nu feern is, un an de Annershaftigkeit vun'e Natuur in'n Johrsverloop.
Marlou Lessing


trüch


na baven


na't Flack

na de Startsiet