Notizen ut'n Märzmaand


 

 

 

de tied, de swaarkraft, de di böögt,
hebbt di tofaten. du verrenkst
di schier, di staht de hoor tohööcht
so faken du an denkst.

man sachten! kümmt de avendstunn
— dat fröhjohr is noch frisch un köhl —,
denn sinkt de swaarkraft sacht togrunn,
denn faat di en geföhl,

as geev dat ok nich mehr de tied,
un du un ik sünd hier: wi staht
in avendlicht, so week as sied',
un nüms seggt mehr: to laat.

 


de wöttel is en ungedeert, is nidhögg sülvst, de draak,
de nachtens an de wöttel vun de weltenesche gnaagt.
de boom is sülvst sin egen dood un gaapt na di — man süh:
en lierlütt bloom wasst merrnmang un is vun ängsten frie.


Fotos un Texte: Marlou Lessing
mehr dorvun: hier

Mit de Anschaffung vun en lütte Digitaalkamera heff ik anfungen, in'n Alldag un bi't Rümströmern in min holsteensche Heimaat eenfache Biller to knipsen vun Ansichten, de mi opfullen, un mit lütte Versen dorbi to seggen, wat mi anspreken dä. In elk Maand kemen poor tosamen. Op Plattpartu bringt wi ehr mit en halv Johr Tiedünnnerscheed rut. Dat is Afsicht: Wat nu is, hebbt wi vör Oogen; man Biller un Versen schallt erinnern an dat, wat us nu feern is, un an de Annershaftigkeit vun'e Natuur in'n Johrsverloop.
Marlou Lessing


trüch


na baven


na't Flack

na de Startsiet