Notizen ut'n Braakmaand

Klick op to'n Vergröttern!

beweegt de steernenhimmel sik
bi dag, foormt niege teken?
sniet dat in sommer? drömel ik? —
de pappelflockenregen
erfüllt de stadt un küsst den dag
in't märken wach.

Klick op to'n Vergröttern!

en boom. wietaf, as en persoon.
will he mi neger kamen?
bloots as ik mi beweeg,
kann he dat doon —
as mien spegelbild.
ik heff em
nich söcht, man ut dat apen
kiekt he mi an;
he hett mi funnen.
he hett tied. he steiht dor
in't apen
as op en grote böhn
un töövt op mi.
ik weet, solang
ik mi nich beweeg
beweegt sik nix.

de spegelwiednis twüschen uns
langt mi as utdruck
för mien leven.
ik bliff
hier stahn, wietaf, as en persoon,
mien leven bloots kuliss.

so staht wi noch.
langsam wasst
dat apen twüschen uns
to.