|
Bluckt up, blaaghell,
nu düster,
wedder blaaghell,
wat länger.
Bluckt up, blaaghell,
nu düster,
wedder blaaghell,
wat länger.
Stunn üm Stunn, Nacht för Nacht.
Lüchtfüür List
mit Stand
55 Graad 3 Minuten
13 Sekunnen Noord,
008 Graad 27 Minuten
10 Sekunnen Oost,
hüüt so, morgen so,
nau neegst Johr so,
fast schreven up Korten vun'e See.
Över Kutter-Schieven
gütt sik een hoge See,
in pietschen Storm-Regen
wassen Wellen in de Höcht.
Dat lütt Schipp
winnt sik anken un janken.
Swoor tuckert
de ole Diesel.
|
Holl dörch, ool Mäken!!
Söß Ogen
bohren sik
in de pickenswatte Nacht.
Fernkieker to Hand!
Swatt blifft swatt,
ne, dat ward swatter.
Veer starke Hännen
hollen dat Roder. ——
Keen Lüchten in de düster Nacht!
Is dat Brennen,
wat dor in de Ogen
flimmert,
Blitzen vun Bloot
un Ängsten in'e Nacht? —
Blaag koort, blaag lang!
Ja, koort, lang! Jaa! Koort, lang!
Lüchtfüür List, Richt Klock Twei!!
55 Graad 3 Minuten 13 Sekunnen!
|
