Lübeck. Grafik vun Jutta BredowMal wedder en lütten Gang dör Lübeck mit Jutta Bredow

"Noch mehr grote Hüüs", teikent vun Jutta Bredow


Hüüt gaht wi mal wedder dörch uns Stadt, so as Jutta Bredow dat mit ehren Teikenstift maakt hett. Wat dat bedüüd, mit en Teikenstift to "sehn", dat hett Rudi Witzke in sien Inföhren to den eersten Spazeergang beschreven.

Bi den eersten Rundgang harrn wi uns grote Hüüs ankeken, bi den tweten Rundgang de lütten. Hüüt kiekt wi na noch mehr vun de groten Hüüs. De Biller kannst per Klick vergröttern. Trüch geiht dat denn mit den Zurück-Knoop in den Browser.

Wenn wi dörch dat olle Borgdoor ringaht na uns Stadt, denn kaamt wi in de „Grote Borgstraat“. Wi hebbt in Lübeck ok ene „Lütte Borgstraat“ un ene Straat, de heet „Achter de Borg“, un dor steiht dat Borgklooster, dat „Maria-Magdalenen-Klooster“. Dor kümmert wi uns hüüt aver nich üm.

Ok nich üm dat Hillig-Geist-Hospital – denn dor an vörbi gaht wi vun de Grote Borgstraat in de Königstraat rin. Un hier, vörbi an dat Huus vun de „Gemeinnützige Gesellschaft“ steiht dat Behnhuus.

Dat Behnhuus

Dat weer en groot Börgerhuus, buut in de Tiet vun den Klassizismus. Hüüt sünd in de schönen Zimmer Kunstwarken to sehn vun Barlach un Munch un vele annere berühmte Lüüd.

Wi gaht wieder. Dat Huus „Königstraat Nr. 21“ spoort wi uns hüüt ok. Dat hett en lange Geschicht. De ganz vörnehmen Lübecker hebbt sik hier drapen, dat weern de „Zirkelbrüder“. Dat weer ok mal en ganz hoget Gericht. In mien Jungstiet weer hier de Stadtbibliothek in. Nu is dat — siet en poor Weken — dat Willy-Brandt-Huus.

Wi gaht dörch en smalle Straat, de „Pfaffenstraat“, röver na de „Beckergrube“. Glieks vörnan is uns Stadttheater. Breet steiht dat dor. Dat Ankieken lohnt sik, veel Jugendstil is dor to finnen, un Musik un Schauspeel.

Dat Theater

Wi aver gaht de Breed Straat hooch, an’t Raathuus vörbi, dörch de Sandstraat, över den Kobarg weg na den „Pferdemarkt“.

Un dor steht dat „Schloss Rantzau“.

Slott Rantzau

En richtig Slott is dat nich, so wat hett dat in uns Stadt nich geven. Dat weer mal en Kurie, de Wahnung vun enen Doomherren. Denn hett dat Graf Rantzau köfft. De Rantzaus höört to den ganz ollen Adel in uns Land. De Graf hett dat ümbuut, modernisiert. Hüüt sitt de Verwaltung vun dat „Schleswig-Holstein-Festival“ dor binnen.

Gegenöver is de kathoolsch Kirch, un dat dröben – na links röver – dat is dat Zeughaus, dat Waffenarsenal vun de ollen Lübecker. Later weer dat mal Polizeipräsidium, de Völkerkundesammlung weer dor lange Tiet in. Dat is vörbi. Keen weet, wat mit dat grote Huus warrt.

Dat Zeughuus

Na, magst noch? Kumm, wi gaht trüch. Över den Markt, vörbi an de Marienkirch na de Mengstraat. Dat Buddenbrook-Huus kiekt wi uns en annermal an, wi gaht den Barg dal bet Nr. 48 un 50. Dat is dat Schabbel-Huus. Fröher hebbt hier Lübecker Kooplüüd leevt. Nu is dat en fein Restaurant.

Dat Schabbelhuus

Kumm, ik laad di in to en goot Glas Wien un denn vertell ik, wat dat för’n Bewennen hett mit den Namen „Schabbel“.


Text: Karl-Heinz Nissen
Februar 2008


trüch


na baven


na't Flack

na de Startsiet