Op Besöök in'n Kinnertied-Goorn

Een Tied-Reis mit Elfi Bock


Wo mag dat bloots ween,

dat ik jümmers noch drööm

vun Opa un Oma ehrn Goorn....

De Goorn vun wiet -- kaamt Se neeger!
Kaamt Se dör de blage Döör...

Dor weer ik noch lütt
in de Hochsommerstiet,
wo mien Opa noch fleit mit de Vagels üm de Wett.
As de Bloom noch blöht
un de Hummeln noch brummt,
mien lütt Süster rinjumpt
in de Schietkuhl bi Navers da voorn.
Wo is dat nu hen?

- Wat weer dat doch schöön
bi Opa un Oma in'n Goorn...

 



Sünndagnameddag denn,
dor keem'n to Besöök
uns Öllern vun Tohuus.
All sitt wi bi Disch,
de Koken is frisch,
de Mannslüüd nascht Koorn.
Op'e Weid gräst Peer.
Wo lang is dat her?

Wat weer dat doch schöön
in all disse Johrn
bi Opa un Oma in'n Goorn.

 

Vör Sünnünnergang,
dor maakt wi kloor Schipp
mang de Beet
un in't lütt Huus.
Dat Unkruut is rut,
de Weeg ward fien harkt
dor achtern un voorn.
Nee, wat weer't wedder schöön
hier buten in't Gröön
bi Opa un Oma in'n Goorn...
Wo lang is dat her?

 

De Blockwogen steiht praat
mit Grööns un kaakt Aavst.
Poor Bloom bobenop,
so treckt wi na Huus
un denkt all tohoop:
Wat weer't wedder schöön
dor buten dat Gröön
in Opa un Oma ehrn Goorn...



...wo is dat nu hen...?

...in't Blöötenmeer!


Uns Opa smökt Piep
uns Oma kaakt in,
de Wespen, se suust
üm Oma ehr Nees.
Lütt Süster krakeelt,
'n Wesp harr ehr piekt,
in't Been stickt noch de Doorn.
Wat weer dat doch schöön!
Wo is dat nu hen,
uns Oma un Opa ehrn Goorn?

...wo lang is dat her..?
Laat Se Ehr Finger över den Sneeball glieden...
 

... un över den Mahn -- aver sachen!

Rükt de ok?

Nu bün'k nich mehr lütt,
vörbi sünd so veel Johrn,
un ik sitt nu in'n Goorn
vun't vörnehme Bad
un kiek in de Lüft.
Mien Gedanken, se fleegt.
Höör die Kurkapell speeln
in Dreeveerdeeltakt.
'n Hummel mi dröhnt in de Ohrn.


 

Un ik denk:
Wo sünd se all hen?
Wat weer dat doch schöön
mit Oma un Opa in'n Goorn.


Dat is nich bloots
utdacht, so is Leven.

Nu seegt Se Adjüs to Huus un Goorn in't Avendlicht.
 



Wo mag dat bloots ween,
dat ik jümmers noch drööm
vun Opa un Oma ehrn Goorn...?

 
Wöör un Biller: Elfi Bock

Elfi Bock

Elfi Bock is een plattdüütsch-hoochdüütsche Malers- un Schrieversfru. Rudi Witzke ut Lübeck sä to Elfi Bock ehr Wark:

"Ji ollen Bööm un ji noch jungen Planten,
ringsüm bewohrt för Störm un legen Frost,
kringelt hoch, gröönt an Stang un Wanten!
Juch Bläder, alle Blööten sünd mien Trost.
Ik will juch plegen
dörch mien lüttes Leed.
Willn uns good verdregen,
so lang mien Weg
up Eerden geiht!"
So schreev de Dichtersmann Simon Dach över sien Goorn.

Mehr begegent uns in "Omas un Opas Goorn".
In een levig Leven mit Kinner, Öllern un Grootöllern
in Goorn nimmt uns Elfi Bock mit ehr Wöör mit.
Ehr innigen Biller dorto laten dat allens to een Belevnis warden.
Tosamen een plattdüütsch Kunstwark vun besünnere Oort!


27.5.2002

trüch


na baven


na't Flack

na de Startsiet