Bawhus-LogoDat Bawhuus, Deel 19:
Dat Fagus-Wark — up den Weg nao't Bawhuus

Van Ludgerd Lüske


Sei käönt dei mehrsten Biller mit'n Anklick vergröttern. Trügge geiht dat denn mit den Zurück-Knoop (Trügg-Knoop) in den Browser (Bruuser).

In dat van Walter Gropius un Adolf Meyer af 1911 bawde Fagus-Wark draopt sik Kunst un Produktschion. Seihn kann man dor moderne Architektur up typischke Bawhuus-Oart mit ein Museum binnen. Van den Schauhliestenfabrikant Karl Benscheidt (1858-1947) kööm disse Updrag. Siene neie Fabrik wull hei up moderne Oart dune an dei Iesenbaohn Ahlfeld - Hannover bawen.


Bild: Fagus-Werk

Bi dissen Fabrikbau find man all dei besünnern Baudeile, dei läöter för den internatschionaolen Stil staohn schullen. Wiss neumen kann man hier dei Vörhangfassaoden ut Glas, dei kloare kubischke Form un dei Form van dei Staohldrägers. Dei krüzigen Pielers werd nao baoben hen schmaler, dortüschken hang dei Glasschötten. Dat Glaswark werd infaotet van einen Staohlraohmen, eiers har Gropius dei Fassaode vör dei Pielers langers plaont. Up dei Deckenhöchte sünd anstäe van dei Glasschieven Staohlblicke insettet. Disse Blickschötten löpp an dei Ecke noch ümm dat Treppenhuus tau. Bit dorhen bawde man dei Ecken van ein Bauwark ümmer orig massiv. Dat schull för einen fasten Indruck sorgen.


Bild: Fagus-Werk

Dei Fortschritt ligg bi den Fagus-Bau in dei "aopen" anleggte Ecke, dei as Anfang van dei moderne Skelettbawoart gellen dait. Dei Ecken van dit Huus sünd nich blots as ein einfach äöverkraogen Betonwark anleggt, dei werd dör eine Krüzkonstruktschion stävig maoket. Dit Bauwark is orig schmal un schull nich monumentaol utseihn. Lichtigkeit un Dörsicht staoht hier as Teiken gägen dei olden un afschlaoten Stein-Tegelbauwiese. Gropius plaonde nich blots dei Butenansicht, sünnern uk dei välen Ansichten van dei Binnenrüüme.


Bild: Fagus-Werk

Disse Bau gellt as Vörlööper van dat "Neie Bawen". Mit den Fagus-Bau hett Walter Gropius ein stilgäben Kunstwark upbawet. Dorbi hett hei einkelne all vörkaomen Elemente tau eine heel neie architektonischke Idee tausaomebröcht. Dei Fagus-Bau is dorümme siet den 26.06.2011 van dei Unesco up dei Weltkulturarve-Liste settet worn.


Bild: Ludgerd Lüske



3.7.2011

trüch


na baven


na't Flack

na de Startsiet