Bawhus-LogoDat Bawhuus, Deel 17:
Dat Konsumhuus in dei Siedlung Törten

Van Ludgerd Lüske


Sei käönt dei mehrsten Biller mit'n Anklick vergröttern. Trügge geiht dat denn mit den Zurück-Knoop (Trügg-Knoop) in den Browser (Bruuser).

StraotenplaonAs wi van Dessau her in Törten anköömen, mössen wi us dor eiers maol taurechtefinnen. Wi harrn Glück, duune bi dei Straoten "An't Dreieck" fünnen wi einen Parkplatz. Denn schull et tau Faute dör dei Siedlung Törten gaohn. Taueiers aover harrn wi forts dat Konsumhuus vör us staohn.

Konsumhuus

BreifmarkeDei Bau för den "Konsumverein in Dessau un Ümgägend" wörd 1928 bawed nao einen Plaon van Walter Gropius as "Inkoopszentrum" för dei Siedlung Törten. Et besteiht ut twei ineinannerstaohn kubischke Baudeile — einen siegen Flackbau för Laodens un einen veier Stockwark hogen Waohntorn, bold in Würfelform.

Dat Huus wörd mit Teegelmürns bawet un hett Stein-Iesen-Bäöhns. Anners as dei Hüüser in dei Siedlung Törten wörn dei groot utleggten Fensters ut Holt, blots dat hochkant loopen Fensterband in dat Treppenhuus ist ut Staohlprofile maoket. Besünners in't Ooge fallt dei utkraogen Balkons un dei formgäven Dackterrassenkante.

In den Flackdackbau wörn ein Café, ein Häökerlaoden un ein Schlachterlaoden unnerbröcht. Läöter kööm anstäe för dat Café ein Laoden för Kant un Band un dei Häökerlaoden leggde sik mehr up Läbensmiddel.

KonsumhuusIn disse Kombinatschion was dei "Dreieck-Konsum", dei heet so wägen den Straotennaomen, bit in dei 1970er Joahre as Inkoopstäe för dei tüschkendör grötter worn Siedlung van Belang. In den Waohntorn wörn neern noch dei Näbenrüüme van dei Laodens unnerbröcht. Doräöver geev et drei Etaogenwaohnungen. Dat bäöverste Stockwark was för alle Inwahners dor as Waschkäöken, Drögebäöhn un Dackterrasse.

Den Krieg äöverstünd dit Bauwark aohne groten Schaoden. Üm 1990 herüm wörd et an Privaotlüe verköfft, wiel dei Konsumverein in'n Konkurs güng. 1995/96 wörd dat Huus restaureert un as Waohn- un Geschäftshuus wiederhen bruket.

Laden an't KonsumhuusFör dei Bawhuuskenner gellt disse Bau as ein best proportschioneertet Gropiushuus.
Dit Huus harrn wi blots kort tweimaol knipset. Dat Weer wull ümmeschlaon un wi möken us drocke up den Gang dör dei Siedlung.


Link tau dat Konsumhuus:



Alle Biller: Ludgerd Lüske
24.8.2008

trüch


na baven


na't Flack

na de Startsiet