de weg na'n anfang

mit dat bild "de anfang" vun rudi witzke


 

 

 

Rudi Witzke: De Anfang
Uhu un Aquarellfarven
1984

nu bliff man strack du geihst bargan
de eer to föten bevert;
un in din kopp so'n föhl, as ob
di flier un flünken fevert

dat maakt de hitt de nimmt di mit
du föhlst ehr wassen, wassen
se grippt din bloot, din bloot grippt ok
un kriggt de hitt to fassen

dat faat di all du kanns nich dal
luurs nich, wat lava flöögt
nu büst du dar de lüttjen haar
in'n nack staht all tohööcht

en pulsen stüürt dar fleten füer
dat will utnanner schesen.
du kiekst in't hart. dat is din aart
un is din egen wesen.

dat chaos luurt, en mann, di an,
sin ogen seggt "vernichten!"
he höllt nich fast — vun nerrn up wasst
de ordnung op in schichten.

un mank jüm töövt du un wat leevt
wat fevert, lengt un brennt
un elkeen finn sik sülven in
sin egen element

de anfang drückt din schullern trügg
un hett din blick hochdwungen;
fast kiekst du trügg un hest "hier ik!"
jüst seggt — orr hest du't sungen...?

du töövs op krieg — man allns ward nieg
un rotglut kümmt ut düstern
un lett sik loos un maakt sik fast
— de fiene bast vun ordnung wasst
üm di un üm din smüstern...


Text: Marlou Lessing
24.3.2002

trüch


na baven


na't Flack

na de Startsiet