Engelstroanen

— Oostfreeschkes Platt —


De Maimond stunn in d' Land. Half wee he all dör de Tied lopen, noa achtern to. De eerste veertein Doagen ween vull Sömmerwarmte dorhen trukken. Vandoach rägen dat so mennich Schuur. Över d' Gröönland seech dat so een bäten ut as Spinnwäben — de Stoom kunn sükk nich van de Grund trennen.

Gesa seet up hör Schokkelpeerd bi Moder in de Köken. Am leevsten wüür see joa in buten speelen, oaber vernoamiddach wee see noch to een Geburtsdach nööcht. Moder har hör all hör Sönndachskleed antrukken, un wull nu nich, dat see sükk noch schidderk moaken de.

Dat Schokkelpeerd stunn aal sied een half Stünn'n still. Moder keek hör all een poarmoal van de Siet an. Gesas Oogen hungen as fastspiekert an de Fensterschieven. Man kunn sehn, wo dat in hör Kopp tokeer gung.
Mama — wor kummt de Rägen her?, stunn dor tomoal een Froach in d' Lücht.
Moder wee dat gannich wähnt, dat hör lütji Deern so laang schwiegen kunn, un har all up irgendwat van hör tööft.

Jungedi oaber ok — disse Froach, de muß see eerst bi sükk in d' Schoone schrieven.

"Kiek moal, mien Lütten, dat sünd Engelstroanen.
Wenn de Häven wulkendikk un pikkschwaart is un dat Woater blods so dör de Lücht andoal löpt, denn sünd de Engels truurich. Wiel een ov anner van uns Minschen wat Schlechts doahn hett. Bliksen un Grummeln dorbi is wat ganzLeeges, denn is us Herrgott düchtich mit us Minschen an d' Schell'n.

Anners sücht dat liekers ut, wenn dat so is as nu.
Witte Wulken un ov un to moal een Schuur — dat is en Teeken, denn freut sükk de Engels över irgendwat up de Eer."

Still wee dat in de Köken — de Sünn luur mit een Ooch dör een Wulkenlokk un nikkopp dorto. De Rägendroapen, de sinnich an de Schieben doal leepen, blenkern as Sterns — Moder streek mit beid Hann'n saacht över Gesas hönnichfarben Hoar — un boaben in de Häven wee groode Freud.

Dat kunn man an de waarme Schuur Engelstroanen sehn, de up de Eer doalfullen.


Den Text hett Ewald Eden för ju schreven. He is links to sehn.

De Biller hett Kensise Anders för ju maalt. Se is rechts to sehn.


14.5.2013


na baven