De 10 Wiespahlen op HebrääschDe Tweite Wiespahl — nu!

(Dat tweite Gebott)


Du schallst Gott sien’ Naam nich unnütt in’n Mund nehmen,
denn uns Herr warrt den nich so dorvun kamen laten,
de Missbrook mit sien’ Naam bedrifft.

(De tweite Wiespahl)

Wat bedüüdt dat?
Wi schalln Gott in Ehrforcht begegen un leev hebbn,
utsloten, dat wi in sien’ Naam flöken, swören, tövern, lögen orrer dregen,
sünnern ehm anropen, beden, laven un danken, wenn Noot över uns kümmt.

(Luther sien Verklaarn)

Nu is dat künnig över de Welt, dat wedder mal een Minsch sik ropen föhlt, mit „sien un Gott sien Volk“ sik gegen dat Volk vun’n Satan to wennen.

Woans dat utsehn kann, hebbt wi al beleevt, as sik Osama bin Laden un sin "Gotteskrieger" (dat weer to Recht dat Unwoort vun't Johr 2001) gegen den "groten Satan USA" opmaken dään.

Mose mit de 10 WiespahlenNu aver sehn wi dat Ganze as in en Spegelbild in dat Witte Huus in Washington. De Präsident Bush nimmt ut sien Gottvertruun sien Sülvstsekerheit. He föhlt in sik den Updraag, dat to doon, wat he för nödig vörgifft. De Updrag kümmt vun Gott (meent he). Dat hett Bush sülven so seggt.

Krieg gegen den Satan! Krieg gegen den Irak! Un wokeen nich för ehm un sien Doon is, de is gegen ehm.

Düütsche Suldaten tröken in twei Groote Kriege mit "Gott mit uns" up dat Koppelslott — een Schandeern vun Gott un Christenlüüd. Denn bin Laden un Co., nu Bush. Hett denn nüms wat lehrt???

— In enen Artikel in dat Blatt „Freitag“ fött Konrad Egge de Noot un de Sorgen vun all de tosamen, de nich ahn Nafragen Bush un sien Kriegsplaners achterherlopen:

„De iraaksche Vizepremier Tarik Asis bedt tosamen mit den Papst, un Osama bin Laden röppt in'n Naam vun Allah to’n Hilligen Krieg gegen Bush up.

Gott kann een leed doon!“

Dat Osama bin Laden un sin Mitmakers mit ehr Doon un Reden Gott lästern, dat weet wi. Avers nümmt de Präsident Bush rechtens dat Woort „Gott“ in den Mund?


Rudi Witzke

24.2.2003


na baven