Dat kannst mi glööven!
Maakt Gröön klook?

vun Elisabeth Tobaben

To'n Anhören hier klicken:

Lesen deit Elisabeth Tobaben.

Wat kloke Forschers so över uns Minschen rutfinnen doot, dat kann faken bannig spannend ween. Nüchlist heff ik von een Versöök leest: Dor hebbt se verschiedene Lüüd Fragen stellt. Een Deel von jüm harren se vörher in't Gröne stüürt, in de Natur, un de annern nich. Un de, de buten ween sünd, de harrn veel mehr wüsst as de annern. Se harrn sik ok noch Saken utdacht, op de de annern, de binnen blieven müssen, gor nich komen weern.

Kann man nu seggen: Gröön maakt klook? Kunn ja angahn. Op jeden Fall deit Gröön de Seele good, stünn in den Artikel.

Ok de Minschen in de Bibel hebben sik woll sowat vörstellt, as se vertellt — un laterhin ok opschreven hebbt —, wo se sik dat vörstellen deen, as Gott de Welt maakt hett. He hett eerstmal en groden Garden plannt, sän se, un dor hett he de Minschen rinsett. Un denn eerst, dor in't Gröne, dröffen se sik Namens infallen laten för all de Planten un Deeren.

Un ok de anner Bibel-Geschicht, in de Gott de Welt in söven Dagen torecht maakt hett, vertellt toeerst, dat Planten un Blomen maakt ward, Vogels un de Fisch. Minschen maakt Gott ok in düssse Geschicht eerst, as dat Gröne al kloor is.

Wat fangt wi dormit an? De Forschers hebben ok seggt — un dat hett mi bannig wunnert —, dat ganz, ganz wenig Gröön genoog is, dat de Minschen dat beter geiht. Un wi bruukt dorför ok bloß kotte Tied in de Natur to ween. Teihn Minüten an een Dag reckt al ut, un dat deit noch nichmal nödig, dat du in'n Garden geihst oder in een Park spazeeren. Ok een Blomenpott in't Büro deit al good.

Ik glööv, dat liggt doran, dat wi denn tosamen sünd mit allens, wat leevt. Dat wi Gott nöger sünd, de ok uns maakt hett. Un dat deit good.

Bi us up plattpartu.de finnt man nu utsöchte Bidräge van disse Radiosendung.