Dat kannst mi glööven!
Anne Grund, over weer nei anfangen

vun Wilfried Theising, Vechta


To'n Anhören hier klicken:


Lesen deit Wilfried Theising.


Vör Tieden hadde ick ne Sülverhochtiedsmisse in eene kleene Kapelle to hollen. De Inrichtung in de Kapelle was antik. Besünners beindruckend was den grauten Stohl för den Geistlicken. Denn Stohl wass mär en Thron. Bescheiden söch he nich uut.
Noa dat Kummseern sette ick mie noch en betken hen. Still wull ick usse Härgott danken. Doch doa wör nix uut. Upp eenmoal kraakte datt in den Stohl. Ick sackte een Stück deiper unn dann lagg ick auk all mett eenen grauten Krach an'ne Grund. Vull mär äs eenen Haupen Brennholt wass van denn Stohl nich üöwerblieben.

Mien Hiärt bliew boll stoahn. Doch de Lüe in de Kapelle rüskeden sick nich. Noa mienen ersten Schrecken moss ick grühlick lachen. Unn de Lüe konnen sick auk nich mär hollen vör Lachen. Ett wass doch rein to komisch. De Holtwüörme hadden ganze Arbäd maket.

Wie alle kunnen lachen üöwer dat Malheur. Owwer ett giff genog Mensken, de an'ne Grund landet unn nich doaüöwer lachen küönnt. Manges is mähr kapott äs eenen Stohl. Wann de Arbäd wegg is, wann de Ehe uteen is, wann Mensken krank werdet or stiärft. Dann is dat nich licht, wiehr upp de Beene to kuommen.

Jesus mäck us Moot. He segg: "Kuommt alle to mi, de ih ju ploagt unn Lasten to driägen hebbt!" (Mt 11,28). He weet, woavan he küert. He is mett dat schwoare Krüüs an'ne Grund goahn. He kunn ett nich mär hollen. Tolest hebbt se em fast maket an't Krüüs, dat he sick nich mär bewiägen kunn.

Doch sien Denken un Föhlen wass frie. So lat he sick nich unnerkriegen. He stellt sick an de Siete van alle, de an'ne Grund liggt. He helpt, dat se wiehr uppstoahn küönnt.

Met em an de Siete, giff't wiehr eenen Anfang.
Nich alles, wat kapott is, kann man wiehr heel maken. Owwer nie anfangen küönnt wie immer.

Denn kapotten Stohl in de Kapelle kunnen wie wegschmieten. Doa was nix to maken. Dat Sülverhochtiedspaar melde sick forts un spendeerde eenen nien Stohl för de Kapelle. De is echt stabil. Doch wann ick mie doa upp sett, bin ick immer noch schalu. So gerne goah ick nich an'ne Grund.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


17.2.2019


na baven