En Trilogie to de Stillen Daag

vun Rudi Witzke


Geboortshus
Foto: Rudi Witzke

Sunsche Wisch 1998
Vör mien Gebortshuus

Stiefe Noordwest!
Achter't Holt
faat he uns.
Wildgöös
up de Wischen.
Ole Barken-Stubben
an'n Weg.

Vör't Huus
toovt de Storm
mit en hoge Pöppel.
Tackeldraht
sparrt uns ut.
Braken de Finster,
swatte Löcker.

Dal hangt
de Dackrönn,
Teigel scheef,
twei!
Mien Tohuus
winnt sik
in letzte Krampen.

Keen blieven Steed
hebbt wi,
nargens,
seggt mi mien Huus.
Laat uns
dat tokamen söken!

Uns Tiet in Gott sien Hannen
"Uns Tiet in Gott sien Hannen"
Klock in'n Lettner vun'n Doom to Lübeck

Uns Tiet

Uns Tiet, wat is dat?
Meten in Daag un Johr,
meten in Kinnerjohr,
jung sien,
ahnen, wat Leven is.

Nich blots güllen
is disse Tiet,
aver dien Sorg un Noot
telln noch nich
up Minschen's Weeg.

Un denn flüggst!
De Groot Leevde
hett di to faten.
Un woans se kamen,
so is se denn ok gahn.

Aver jung büst,
finnst dien' Passer.
Vörankamen un Kinner,
du steihst in besten Saft:
De Welt is dien! Is uns!

Ehrdat di ümdreihst,
sünd Kinner ut' Huus,
du tappelst,
wenn't Glück di blifft,
mit dien' Wegkumpaan.

Krüppst, stotterst,
aver vull Freud,
wo Enkel lachen
un Minschen an dien Weeg
mit di gahn.

Tiet, wat is dat?
Villicht hest't verstahn:
Ut Sempkoorn kümmt
de Plant un blöht.
Un is de Saat denn riep,

rüst di
bi lütten för't Gahn.

Böögt in'n Storm
Böögt in'n Storm — Foto: Rudi Witzke

 

Still Sünndag

Besünner Dag?
Villicht ja,
villicht ok nich.
Een Dag "Erinnern"?

Erinnern is Leven!
Alltiets!
Wi hebbt de Öllern
begraven.

Den Broder!
To fröh
halten se
den Fleger dal:
Krieg is Krieg.

Denn unsen Jung!
Uns Leven
stünn still,
steiht still.
Un geiht wieder.

Plaag
dat Leven
...un Geschenk.
Still swiegen
un Lengen

na'n Snack
vun di to mi
un — vun jüm.
Se all höört to mi
alldaag, tietlevens.

Tosamen sünd wi!
Wi all gahn
uns Weeg
Siet an Siet
bit to'n Sluß.

Wat denn?
Keeneen weit.
Lengen un Höpen.
Uns Erinnern
is ehr Leven un uns.

Höpen: Blöht hangen an'n Fels!
Höpen: Blöht hangen an'n Fels! — Foto: Rudi Witzke


16.11.2003


na baven