Dat kannst mi glööven!
"Dei Himmel krigg ein Gesicht"

vun Heinrich Siefer


To'n Anhören hier klicken:


Lesen deit Heinrich Siefer.


Token Wäken Dönnerdag fiert de Karken Christi Himmelfohrt. Ein Fest, wor gaue Frönne van'anner Affscheid nähmt. — Dat passt ja seläve nich tosaomen, so schinnt dat. Wisse dann nich, wenn wi dissen Affscheid as 'n Enne van 'n Weg mit einen gauen Frönd anseiht, den wi nie nich we'erseiht. Veiertig Daoge nao Ostern wedd Jesus in'n Himmel upnaohmen. He nümmt den Platz in, de üm tausteiht. "He sett't sik an Gott sien rechte Siete." Dor kummt he her — dorhen geiht he we'er trügge. In Paulus sienen Breif an de Epheser läst wi: "Un he hett us mit üm upweckt un us mit üm tosaomen einen Platz in 'n Himmel schenkt, denn wi hört ja Christus to." (Eph 2,6).

Dat is dat eine, wat us de Geschicht van de Himmelfohrt vertellt: De Himmel steiht us open, dor is eine Stäe för us frei hollen. Un is dat nich all ein Grund ton Fiern?

Man de Geschicht van Jesu Himmelfohrt will us noch mehr künnig maoken: De Himmel is nich eenfach bloß baoven, eine Stäe wiet weg. De Himmel is uk unner us. Et giv ein old Beld van Lucas Cranach. Et wieset Jesu Himmelfohrt. Man dor is noch wat besünners up to seihn: Up den Barg, van wor Jesus in 'n Himmel upnahmen wedd, blievt Fautstappen trügge. Wat schall dat?


Jesu Himmelfohrt. Bild: Germanisches Nationalmuseum, Nürnberg
(Leihgabe der Protestantischen Kirchenverwaltung)

De Fautstappen vertellt villicht dit: "Richt diene Oogen nich bloß nao baoven to up dat, wat di an 't Enne van dien Leven wisse intomeute kummp. Richt diene Oogen uk hendaol up de Eern. Dor fang de Himmel all an. Wisse, nie nich is dat de heile Himmel, man Spooren d'rvan. Wor de tau finnen sünd? Jesus sülvest vertellt dorvan, as he van siene Frönde Afscheid nümmp: "Nu gaoht los in de heilen Welt un predigt aale Mensken dat Evangelium! Un de, de glöven deit, de weerd allerhand Wunners beleven. Kranke weerd se de Hand upleggen, un de weerd gesund weern." (Mk 16, 15; 17; 18.)

Wor Mensken van Jesus vertellt, wor Mensken in siene Spooren gaoht, dor fang de Himmel an: Dor, wor wi us gaut bünd, — dor, wor nah 'n Striet Mensken weer up'nanner togaoht, — dor, wor ton Bispill Mensken sik üm dat Recht van Arbeiters ut Osteuropa kümmert, de in de grooten Slachtereien faoken för man minne Geld ehre Arbeit daun mäöt un dortau uk noch väl Geld för ehre slechten Kaomern betaohlen mäöt.

Mit Jesu Himmelfohrt kriggt de Himmel ein Gesicht — Jesu Gesicht. Un dat is waohrhaftig ein Grund ton Fieren.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


13.8.2017


na baven