Dat kannst mi glööven!
Wat fang ick mit denn Rest van mien Läven an?

vun Pastor Alexander Rolfes


To'n Anhören hier klicken:


Lesen deit Alexander Rolfes.


Verläden Johr hebb ik dei Geschichte ‚Herr Wohllieb töff up ein Teiken' van Susanne Niemeyer läsen. Dei heff mi bannig good gefallen. Dei möchd' ik jau disse Wäken gern vörstellen. Lustert eis maol tau:


Merrn in'n Alldag äöwerfallt di de groten Fraogen

Dat was an einen Dingesdagmorgen, as Herr Wohllieb waok wüdd un heilsmaol dörnanner was, glatt van 'n Padd aowe, so as wenn sik mit'nmaol ein groot Lock updoan har. Gägenöver schüttelde eine Frau innen drütten Stock ehren Teppich över dei Köppe van Fautgänger ut. Dei Häven was wat gries — so at innen Windmoand. Un eigentlick was allet so as alltied, bloß dat Herrn Wohllieb upmoal disse eine Fraoge dör 'n Kopp schööt: Wat fang ick mit den Rest van mien Läven an? Up einmoal was dei Froage dor wän, jüss at hei siene Kuusen putzen dö un sück innen Speegel bekeek. Sien Hoar was sacht sülvern verklöört. Passede to sienen Nachtpulter, weckern hei in alle groaden Wäken dreegen dö. In dei ungraoden Wäken harr hei einen Mintgreunen an. Ein bäten wat waoged, aover bi Nacht seehg üm joa kiener… Man dann, uck bi't Freuhstück was de Fraoge nich verschwunnen. Üm de Middagstied füng hei an, sien Boadezimmer tau schrubben, dat he up anner Gedanken kaomen dö — man dei Froage bleev. Hei kunn se nich mehr lossweern.
Wat fang ick mit denn Rest van mien Läven an — disse Fraoge, dei heff't in sück.

Wi stellt us den Dag över ja väle Froagen: Wann stoah ick up? Wat gifft tau äten? Weckern will ick beseucken? Koam ick ut mit mien Geld? — Nich ganz unwichtige Froagen in usen Alldach. Aover sünd dat dei Froagen, up dei dat ankummp? Ick meine, so richtig ankummp? Dei Froage van Herrn Wohllieb, dei hebb ick mi erst nich traut tau stellen. Ik was bange, dat ick kiene Antworten harr. Un, wenn ick ehrlick bünn, harr ick dat uck nicht forts un seuck dor immer noch wieders nao. Villicht kummp dat dor uck goar nich so up an, dor drocke mit eine Antwort bi dei Stee tau wän! Sück disse Fraoge överhaupt tau stellen, sei tautauloaten, se uttauhoalen — dat is schwoar, man et helpet us, dat wi maol mit 'n anner Ooge up use Läwen kieket.

Un wat is mit Herrn Wohllieb? He hoalt dei Froage uck ut un frög einen Experten ümme Roat. Man wo dat mit üm wiedergeiht — dorvan morgen dann mehr!


Översicht över de Reeg
"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


29.1.2017


na baven