Dat kannst mi glööven!
Ein Sägen wäsen

vun Mechtild Pille

To'n Anhören hier klicken:

Lesen deit Mechthild Pille.

Wat vandoage nich alls all geiht. Du sittst noch in de Bahn, man stellst all den Oaven bi di to Huuse an. Dann is't all fein warm, wenn du innkummst. Or du nümmst dien Handy un kickst tau, off du de Lüchten uk alle utknippst hess, as du wegfeuhert büss.

Mit de neien Technik geiht masse mehr — boald alls, wat du di so denken kanns un för dien Bequemlichkeit gaut is. Man ik heff dat nu all so, uk oahne de Technik:
Dann, wenn dor ein in'n Huuse is un den Oaben all anfüürt heff un dat Äten all up'n Disch krägen heff, wenn ik nao Huuse kaom. Un d'rtau heff uk noch ein taun Schnacken un Vertelln. Manges denke ik bi mi: Wenn all de Technik us dor henstüürt, dat wi gor nich mehr mitnanner in 't Schnacken un Vertellen kaomt, schients aohne einanner tau könnt, denn is dat nix för mi. Mi ligg dor väle an, mit annere tohoope tau wäsen un uk maol den Oaben för annere antobeuten.

De Bibel vertellt, dat Besünnere an Jesus wör, dat he gern in Sellskup was. Dor sünd de Jüngers un ännere Lüüe, uk Fraulüe un Kinner. He löt sik gern inloaen. Un wenn he vertellen dö, lusterden de Lüüe gern tau. Man he kunn uk taulustern, so as se dat noch nie nich belävt harn. De Lüüe fraiden sik, wenn he tau Besöök köm. De Mensken feuhlden sick van Jesus annoahm. De Tied mit Jesus was för de Lüüe alltied ein Sägen.

Mi is vör 'n Tied maol ein Huussägen upfallen, de lutt so:

Kum in, sett di daol, laot us schnacken un us verstoahn.
In dit Huus schall Fräen wän un Gott sien Sägen dor öwer stoahn.

Jo, Hüüser, wor dat so is, dor mag man gern innkaomen. Man dat heff immer mit de Mensken to daun, de dor in woahnt. Mensken, de taulustert un di wiest, dat du dor gaut uphoben büss. Mit de Technik van dien Smartphone kanns sowat nich regeln.

Wisse, manges hang uk woll moal de Huussägen scheif. Nich immer löppt aals inne Riege bi us. Man wenn du dann ein Huus weißt, wor du di utschnacken kannst, dann is dat ein Sägen.