Palmsünndag


Palmwedel. Bild Felix Burton/Wikimedia Commons

Poor Gedanken vöraff


Nintendo 3DS, Bild Evan-Amos/Wikimedia Commons

Ik fraag en Jung na de neegsten groten Festdaag. Hei kümmt jüst vun't Fautballträning, wo hei utsöcht worrn is för en Liehrgang in de Landsfautball-Schaul. "In Reli snackt uns Liehrersch letzte Tiet kuriosen Kraam. Dat ward denn woll bald Ostern sien. Ik warr nich klauk ut, ik finn Ostern aver okay. Endlich gifft dat wat grötter Geschenke. Ik weit so veel: Nintendo 3DS kümmt in de Geschäffte. Ik will so en Ding to 230 Euro hebben un villicht twei Spillesammlungen to 45 bet 47 Euro.

För Osterhasen un Eier un seuten Kraam bin ik all tau old. Ik söök doch nich buten rüm, wo Vadder orrer Mudder den Kraam mang de noch half verdröögten Blaumen versteckt hebbt. Is ja man bloots gaud, dat na Wiehnachten mit de Geschenke nu endlich wedder en Dag kümmt, wo de Olen de Geldkniep upmaken mütt.

Wat mi süss noch to Ostern inföllt? Osterfüür! Dor mutt ik hen. Dat gifft Braatwust un Curry-Wust. De niege Achterbahn in'n Hansapark kunnen wi uns ok ankieken. Dat is aver allens nix för den 1. Osterdag. Denn steiht Mudder in de Köök un sweet. Se maakt en groten Braden för uns. Mit Verreisen is nix. Vadder seggt, dat dat Benzin to düür worrn is. Ja, dor is denn ok noch wat mit Jesus. So genau weit ik dat nich, wat hei in den Himmel suust is orrer hei över dat Wader lopen is orrer ehm wat anners passeert is. Wiehnachten is hei up de Welt kamen. Dast weit ik wiss. In den Laden, in den Mudder 'Star Wars' vun Playmobil för mi köfft hett, stünn en Stall. Un dor weern Lüüd mit en lütt Kind. Dat schull Jesus sien. Nu erinner ik mi: Dat geiht aver üm dat Krüzigen un dat Uperstahn vun Jesus un wat dat för uns to bedüden hett. Ik kapeer nix dorvun, un mien Öllern fraag ik nich. De snackt nich vun, ik weit ok gor nich, wat se noch in de Kark sünd."

Wat seggt de denn, de richtig Ostern fiern? Een weer Dorothee Sölle. De hett seggt: "To seggen, dat hei uperstahn ist, hett bloots denn en Sinn, wenn wi weiten, dat ok wi vun de Doden uperstahn warden, vun den Doot, in den wi nu sünd. Ostern höört mit uns un uns Leven tosamen. Süss maakt dat keinen Sinn."

An Ostern liggt Doot un Leven, Begraven un Uperstahn dicht bi eenanner. Dat weer för Jesus güllig un is dat für di un mi, för uns all hüüt nau so as domaals. Eberhard Jüngel harr måål för Ostern dissen Sprook: "Das unterscheidet Ostern von einem Osterspaziergang: Spaziergänge ändern nichts. Sie enden in der Regel genau da, wo sie anfingen. Ostern hingegen ist ein Aufbruch ohne Ende." Hei meint, wi schullen in disse Daag uns Afgunst, unsen Hatt, unsen Striet mit de Maten begråven. Wi schullen uns eigen Schuld an dat Krüüz hangen, an dat Jesus storven is. "Laat tau, dat anner di vergeevt, un breek up to en nieges Leven. Versöök dat tominnst un söök di en Maten, de di dorbi helpen kann."


Bild Rudi Witzke

Erinnern an Maria Salvung

Ik weit, dat Jesus hüüt na Jerusalem intrecken deit. Ik weit, dat de Lüüd glöven, dor kümmt en König up en Araber-Schimmel un nich up en Äsel. Se lopen mit Palmtwieg ehm entgägen un raupt "Hosianna!" Ik will aver maal de anner Geschicht uns in't Erinnern bringen, de wi ok kennt.

Söss Daag vör dat Osterfest keem Jesus nu na Bethanien. Dor wåhnt Lazarus, den Jesus ja vun de Doden upweckt harr, un dor geven se ehm to Ehrn en Mahltied. Un Martha bedeinte bi Disch. Lazarus aver seet mit an'n Disch. Dor nöhm Maria en Pund Ööl — dat weer echtes Nardenööl, un dat weer heel düer — un saalvt dormit Jesus sien Fööt un dröög se denn mit ehr Hoor wedder aff. Un dat ganze Huus weer vull vun den Nardenölduft. Dor sää Judas ut Ischariot argerlich — wat doch een vun sien Jünger weer un de ehm ok nahsten verraden wörr: "Dat verstah ick nu doch nich! Mi dünkt, dit Ööl harrn wi doch beter verköpen kunnt för 1000 Euro un dat Geld an de Armen geven." Dat sää hei aver nich, wieldat ehm so veel an de Armen liggen dää; ne, he weer en Spitzbauf, un he harr de Kass un steek vun dat, wat dor insteckt wörr, allerhand in sien eigen Tasch.

Dor sää Jesus to ehm: "Laat ehr doch in Rauh! Dat is good so. Laat ehr dat upwohrn bit hen to den Dag, dat ji mi to Graff bringt! Denn arm Lüüd hebbt ji alle Tiet bi juuch, mi aver nich!"

Johannes 12, 1-8

Wi willt uns ierst eenmaal een Bild beseihn:


Maria saalvt Jesus de Fööt, Bild in den Hochaltaar vun Ballum

Üm en Disch sitt Mannslüüd un sünd woll jüst fardig mit dat Eten. De vörn up de linke Siet argern sik bannig över dat, wat Maria dor mit Jesus maakt. Ehr Gesichter seihn füünsch ut. Denn, wenn wi üm den Disch rümgaht, kamen twei, de allens nix angeiht, so schient dat. De neegsten beiden aver hebbt ok argerliche Flunschen. Sünd wi dor ok afbildt? Bi de Füünschen? Bi de Gliekgülligen? Bi de Verargerten? Wokeen weit? Wat is de Ursaak? Maria hett mit een Pund Nardenöl Jesus de Fööt inreven un inmasseert. Jesus deit dat gaud.


Bild Rudi Witzke

Beid weiten, wat Doot un Leven is. Lazarus is wedder uperstahn vun de Doden. Jesus weit, dat hei in de negsten Daag in sienen Doot geiht, beschimpt un bespiet, as een Verbreker na Golgatha dreven ward. — Dat allens geiht Maria un Jesus dörch'n Kopp. Dat mååkt jüm trurig, drückt de Seel. Un dor kümmt Maria de Idee mit dat Nardenöl, wat hüüt wohrhaftig noch dat Gramm 2 Euro kost.

Judas reegt sik up. "Dat's Verswennen! Dorför harrn wi för Arme veel Broot kregen!"
Natürlich stimmt dat. Dat weer to veel Öl för dat Salven vun Fööt. Judas süht de Welt as en Penningfuchser an. Dat sien Meister un Herr bald starven müsst, dat kümmt ehm un ok de annern Mannslüüd an den Disch nich in den Sinn.

Jesus maakt all disse "vernünftigen, ökonomisch un ethisch richtigen Argumente" tonicht. Hei seggt: "Laat Maria dat daun! Sei deit dat för mien Gräffnis! Dat is ehr Gaav to mienen Doot."

Dat avers verstahn bloots Maria un Jesus sülven. Jesus nümmt giern dat Geschenk vun Maria an. Ehm deit dat gaud, dat en leive Minsch ehm zoort anröögt un ehm dat Beste schenkt, wat se hett. In disse Tiet vun Spannung, vun Angst, ok vun Twievel un Eensamkeit ist dat, wat Maria maakt, wichtig un upmünnernd. Dat is Marias letzt Leivsdeinst. — Keen anner vun de Jüngers kümmt up solk Gedanken. Se daun, as wenn Alldag weer. Se strieden sik, se meckern an Maria un ehr Daun rüm. Se sünd rechte Äkel. Dormit versteckt se ehr Ängsten un Bäwernis. Hebbt ok wi Bammel in de Saak mit Doot un Leven un versteckt dat un seggt: "Dat is doch allens Kinnerkraam!"? — Jesus hett jüm dat wiss miehr as eenmåål vertellt, wat sien Weg sien ward. Se schuven dat wiet von sik. "Sie verdrängen es!" Se daun so, as wenn Jesus jüm wat vörtüddelt hett. Se hebbt nich henhöört un höört ok nu nich hen.


Palmwedel. Bild Felix Burton/Wikimedia Commons

Villicht hett aver Maria mit ehr Teiken vun dat Salven Jesus to ehren König salvt. Dormit hett se en propheetsch Teiken sett. Disse Jesus, de elennig an't Krüüz ümkamen ward, ward uperstahn.

Wenn de Jünger in Bethanien wenig Daag vör Jesu Enn dat nich to Kopp kriegen orrer nich för wåhr hebben willt, wat kümmt, dennso is dat keen Wunner, wenn en Jung hüüt di seggt: "Dat ward denn woll bald Ostern sien. Endlich gifft dat wat grötter Geschenke. Ik weit so veel: Nintendo 3DS kümmt in de Geschäffte. Ik will so en Ding to 230 Euro hebben un villicht twei Spillesammlungen to 45 bet 47 Euro. "


Martha, Jesus un Maria. Bild Jan Vermeer van Delft

Anner Kinner beden mit all an den Meddagsdisch in dat een orrer anner Huus un jiepern nich na'n Nintendo 3DS:

"Kumm, Herr Jesus, wees du uns Gast,
un segen, wat du uns geven hest."

För de ward wiss een Ostern maal dat rechte Ostern sien.


Rudi Witzke
17.4.2011


na baven