Dat kannst mi glööven!
Gauet Ackerland

vun Roswitha Osterbrink


To'n Anhören hier klicken:
Lesen deit Roswitha Osterbrink.


Inne Bibel hört wi faoken van fruchtbaoret Ackerland, van Saot, saien, wassen un aarnten. Dor giv dat taun Bispill dat Glieknis, wor ein Buur siene Saot utbringen deit. Un alltied fallt uck wat dorhen, wor nicks wassen kann. Dei Buur schmitt wat up'n Weg. Un dei Väögels kaomt un frätet dat up. Manges fallt uck wat in dei Doorns. Wat fallt uck up steinigen Grund. Uck dor kann dei Saot eigens nich wassen. Dor is ja nich naug Ern. Un wenn dei Sünne kummp, verbrennt dat forts. Dat is also kien fruchtbaoret Land. Dor kann jao nicks wassen.

Dei Buur schmitt so väle Saot an dat gaue Land vörbi, dat man sick frögg, worümme hei nich uppassen deit. Is üm dat egaol, wor dat henfleigen deit? Worümme kick hei nich genawe tau?

Ick mott jao seggen, dat ick nich immer aals fortsen verstaoh, wat inne Bibel schräven is. Ick verstaoh ein gauen Deil, man wisse nich aals. Un ick hebb dor väle öwer naodacht, wat dat mit dat Glieknis van den Buurn un dei Saot wull up sick hebben kann. Wenn dei Saot in dat Glieknis dat Woort von Gott mennt, siene Böskup för us, dann mott ick mi aff un an fraogen, off ick ein fruchtbaoret Land för Gotts Woort bün. Kann siene Saot bi mi wassen? Off fallt dat bi mi ünner de Doorns off up steinigen Grund? Jao, uck in mien Läwen giv et dat ein off anner Saotkörn, wat nich up 'n Grund fallen deit, wor dat glieks wassen kann.

In'n Olldag, wenn dat üm dat Inkoopen geiht, kann ick van mi nich seggen, dat ick blots dat koope, wat ick bruuken dau. Blots dor koope, wor aals reell un ehrlick hannelt is. Un mit dei Schöpfung gaoh ick nich aaltied so ümme, at dat gaut för ehr is. In'n Plünnenlaoden achte ick nich dorup, dat dei Lüüe, dei dat Tüüg naihet hebbt, uck gaut dorför betaohlt worn sünd. Ick koope uck ganz gerne dei Büxen van mien leevste Marke un up dat Smartphone sitt achtern ein anbäten Appel up. Nich aaltied hannel ick so, dat dat aals recht un richtig is.

Dorümme: Wenn ick dat so recht överlegge, is 't doch gaut, dat dei Buur nich so genawe dorup kieken deit, wor wat henfleigen deit. Dann kann uck up mienen steinigen Grund wat dorvan ankaomen. Kummp blots d'rup an, wo ick dor mit ümmegaohn dau. Dei Saimann giv riekelk. Hei gönnt aale wat. Wenn ick gauet Ackerland weern will, dann mott ick bi mi sülms anfangen. Dann kann dat Saotkörn as ein Geschenk taun Wassen off Blaihen kaomen. Un so kann dor dann uck ein gauen Aarn ut weern.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


14.10.2018


na baven