Dat
kannst mi glööven! vun Roswitha Osterbrink To'n Anhören hier klicken: Mit mienen Orientierungssinn is dat nich so gaut bestellt. Wenn ick ünnerwegens bün, mott ick mi aals genau upschrieven, wor ick henmott. Änners kaom ick nich an. Dorümme is för mie so'n Navigationsgerät in't Auto 'ne feine Saoke. Domaols, as dei Autos dat noch nich aale harn, kreeg dei Bifohrer eine groote Kaorten up'n Schoot. Hei mösste kieken, wekker Straoten dei Fohrer langes mösste un of dat nu nao links off nao rechts güng. Dei Bifohrer har dat Seggen doröver, wo dat langes güng. Man hei was uck schuld, wenn man nich dor anköm, wor man henwullde. Nich selten kregen sick dei Fohrer un sien Bifohrer dorbi heller inne Futten. Wenn use Auto kien Navigationsgerät har, was dat bi mi un mien Kerl wisse nich änners. Dat is vandaoge masse bäter. Man stellt vör dei Fohrt in, wor man hen will; mit Straotennaomen un Husnummer. Wenn man dann ünnerwägens is, kummp eine Stimme ut dat Navigationsgerät, dei dann genawe segg, wor man hen mott. "Bitte nao lünks affbögen!" "Nu rechts affbögen!" Wenn dei Fohrer dann aober nich up dei Stimme lustert un annerswor henföhrt, fang dat Navigationsgerät fortsen an tau räken un segg dann eine neie Strecke an. Man sei bliv wisseweg fröndlick un segg taun Bispill, dat man ümmedreihn schall. Egaol, wo faoken man den verkehrden Weg inschlaon deit. Up dei Stimme kannst di verlaoten. Aff
un an fraoge ick mi, wor geiht dat in mien Läwen naotau? Wecker
sägg mi, wor 't langes geiht? In use Läwen is dat nich so
einfach at in 't Auto. För use Läwen könnt wi nich
einen Apparaot anschluuten, dei us dann genave segg, wor 't langes
geiht. "Hör up dei Stimme" sing dei Sänger Mark
Forster in ein Lied. "Hör up dei Stimme, hör, wat sei
seggen deit". At Christ is Gotts Woort miene Orientierung. Dat
Navigationsgerät för mien Läwen. Gotts Woort, siene
Leivde drägg mi dör mienen Olldag un wieset mi denn Weg.
Egaol wat kummt, ick mott den Weg nie nich allennig gaohn. Uck wenn
ick mangesmaol glöve, dat ick verlaoten dorstaoh. Uck wenn dat
aff un an äöver Ümmewege geiht. Ick kann mi wisseweg
up siene Stimme verlaoten. "Dat
kannst mi glööven!" is eine plattdütschke
Andachtriege in't Radio (NDR),
dei siet den 1. Advent 1953 staodig in't Programm staiht. Tau Tied schriewet hierför rund 75 evangelschke un katholschke Theologen staodig Andachten up unnerscheidlicket Nedderdütschet un Oostfäölschket Platt. Sendet werd maondaogs bit freidaogs üm 14.20 Uhr van NDR 1 Neddersassen. Bi us up plattpartu.de finnt man nu utsöchte Bidräge van disse Radiosendung. 23.9.2018
|