Verdekkselt nochmoal...

vun Ewald Eden

Lesen deit Ewald Eden in oostfreesches Platt.

Krööch un Autos verdroagen sükk nich. Dat Auto sächt, wenn du in d’ Krooch up Visit wääsen büst, bruukst du mi nich koamen. Wiel dat joa ok bäter för de Säkerheit is – un wiel Minsch sien Auto so leev hett, hollt he sükk dornoa. Meesttieds tominnst. Dat is wiers good so. Kanns di een büld Verdreet mit van d’ Liev holln.

Nu givt dat oabers noch Mannslüü, de setten sükk tägen hör blikkern Kist dör. De goahn in d’ Krooch, wiel sükk Minsch moal ov un to wat günnen moot – dat Foahrtüch mit de veer Röä blivt denn eenfach in d’ Huus. Ok wenn dat Deert denn een bietji plierich ut de Luchten kikkt. Kann sükk joa solaang wat mit sükk sülvst vermoaken – Kilometers telln ov so.

Werner hört ok to disse stoafasten Karakters. Wenn he Lüst up een Beer – ov ok woll up twee hett – sett he sükk tägen sien Auto dör. Ok wenn dat muulpruult – un annern mörgen nich anspringen deit. He kläemt sükk sien Peddmannsülvst tüschen de Been’n un jükelt up de näächste Krooch doal. De Schlöädels van d’ Auto nemmt he mit – nich dat de Koar vöör Düllichkeit up eegens Hand een Spritztuur moakt. Sien Rad moot denn solaang an d’ Siedelskantsmüür bi d’ Krooch up hüm wachten. Dat dat Rad nich vöörtieds alleen noa Huus henkrüdelt, kummt dat ok up Schlött.

Nu hett Werner bi disse Tuuren joa stoadich twee Schlöädels in d’ Büksentaaschke. Sien Autoschlöädel un sein Foahrradschlöädel. Wenn he noa een poar Stünn’ns in d’ Krooch een Deel van sien Verstand in Beer inpakkt hett, verwesselt he woll moal de lütji missingsch Deerten – un will mit de Autoschlöädel sien Rad upschluten. Dat is normoal – dat kann passeern. Noa veermoal pröäkeln maarkt he dat meesttieds. Oaber körtens is hüm wat ankoamen – dat givt to denken – ikk hevv to hüm sächt: Werner – hevv ikk sächt – dien Auto, dat hett di een Gehirnwäsche ünnertrukken. He seet näämich jüüst mit Mors up d’ Soadel – dor greep he woll fiefmoal noa de linker Sied. Un as sien Kolleech hüm frooch, wat dat schull, kricht de to hörn: Bevöör ikk losfoahr, moot ikk mi doch eers anschnalln. Joa – un dat, meen ikk – dat givt denn doch woll to denken.

Döst? Wenn du den Autoschlötel behollen wullt: Nimm Water! Foto: ML