De Ogenklapp

vun Heinz Tiekötter


Söben Johr lang Lienjendeenst, jümmers vun Genua no de Karibik un wedder trüch. An'n Enn feuhlst du di as'n Strotenbohner un nich as en Koptein, sä Hannes. He harr düsse good betohlte Hüüer blots annohmen, wiel dat siene Wilma an dat düütsche Konsulat in Genua versett worden is. De beiden muchen düsse lebennige Stadt un leevten hier geern. Un alle soss Weeken weer Hannes to Huus bi siene Fro.

Privoot wohnten de beiden in Varazze un dat is jo wull de scheunste Oort vun de heele Blomenküst. Un Hannes un Wilma kregen dor veel Beseuk. Wenn Hannes siene ehemoligen Kopteinskollegen vör de Döör stunnen, mit de he freuher op Afrikofohrt ünnerwegens weer, denn harr'n se jümmers veel Spooß. Un se kunn'n ruhig mol enen öbern Dost drinken. Hannes weer jo mit siene Kumpels jümmers mit Wilmas Wogen in de Stadt un an de Küst ünnerwegens. Dat Auto harr nämlich en wittet Diplomoten-Kennteken "CC" achtern an. Mit so'n Schild bruukst keen Bang för Polizeikontrullen to hebben.

Annerlest weern Hannes siene Kollegen weddermol op Beseuk an de Riviera. An'n Obend wullen se tosomen dat Nachtleben vun Genua studieren. Bi den lesten Beseuk harrn se nich allens schafft. Se weern düchtig ünnerwegens un harrn veel Amüsement. Junge, Junge ok, wat geiht in so'n lebennige Hobenstadt obends de Post af! Lang no Meddernacht stüerte Hannes mit sien Frünnen ünnen an de Küst lang to sik no Huus hen. Max is dat toeerst opfullen: An den Binnenspegel hung 'ne Ogenklapp vör de Windschutzschiev. So'n Ding harrn sien Frünnen vörher noch nienich bi Hannes sehn. Max wull weten, wat dat mit düsse Ogenklapp op sik harr. Hannes grien man blots in sik rin. Man de annern leten em keen Roh un pierten jümmers wieder.


Hm, is Hannes etwa Pirat? Orr is de Pirat hier duhn?

Dat help Hannes denn all'ns nix; he müss de Büxen doolloten un mit de Sprook rutkomen: "Djä", sä Hannes, "ik drink jo keen Boddermelk. Un wenn ik 'n Lütten in'n Tee heff un dat is villicht 'n beten mehr worrn, denn passiert mi dat oftens mol, dat ik doppelsichtig warr. Dat is'n Schietgefeuhl; wenn du mit'n mol twee Autos vör di hest, wo kott vörher blots een west is. Sowat verunsekert di fix bie't Fohrn! — Wenn ik denn ober de Ogenklapp opsett", sä Hannes, "denn geiht dat wedder astrein un ik find mi good trecht!"



31.8.2018


na baven