Dat Du mien Leevsten bist

vun Silke Frakstein

Schietbüdel un ik sünd nu all sooooo lang verheiroodt. Wi weet, wat Se orrer He mag orrer nich. Un wann de beste Tiet is, nix to seggen.

Wi hebbt veele scheune Hobbys, un Langewiel kennt wi nich. Wi denkt an freuher, as wi uns kennen lehrt hebbt. Hüüt köönt wi över veele Soken smuustern.

Un bi dat Studeren vun't Blatt bün ik so an't Grübeln.
Wi kümmt de Lüüd hüüt tosomen? Danz op de Deel gifft dat villicht noch op'n Dörpen, ober in de Stadt? Parship villicht? Alle twee Minuten enen niegen Partner. Mann, dat kost jo Nerven!

Nee, op de Siet vun de Bundeszentrale "liebesleben.de". Un dor geiht dat in de Hauptsook um "sexuell übertragbare Krankheiten. Un dat passt wedder to de Meldung, dat Lümmeltüten (Präservative) de Renner in de letzte Tiet sünd.

Lümmeltüten mit Hart un Banane mit Lümmeltüüt

Ober wat kümmt vörher? Eerstmol mööt se jo ton'anner finnen, also een "Date", as man hüüt seggt. Un dat schall un mutt knistern. Över so'n Tablett is dat nich so eenfach. "Tinder-Passwort" is anseggt. Dor kannst swiepen (Dating App) mit de ganze Welt. Ober beter is dat doch so richtig, so ähh, dat Gefeuhl un de Blick un, na ja, eenfach de Neegte. Buten in de Natur gifft dat veel to seh'n un to heuern. Un snacken geiht ok un Coffi to go is keen Problem.
Un allens wat noch so in'n Kopp is, geiht över de Kiste (PC) mit Kamera.

Ganz anners is de Idee vun enen Supermarkt: Jeedeen Freedag von Klock 18.00 bit 20.00 köönt sik de Singles an'n Ingang een Hart mit'n Nummer an de Jack orrer annerswo anbacken, un an de Kass heet dat denn: Eine Nachricht für die 25, bitte kommen Sie an Kasse 3. Villicht drööp sik ober ok Nummer 25 bi de Butter un gegenöver liggt Fisch un dor steiht Nummer 23. Dat is denn Butter bi de Fische. Un wenn dat bi de beiden schnackelt un he froogt: "Dröff ik Se inloden in mien Wohnung? Ik wies Se mien Sammlung..." Oh haua, haua ha!

Na, se mookt sik trecht, noch 'n lütt beten Rüükwater, kümmt rin in de Wohnung — un kriggt keen Luft. Dat Mannsbild hett 1500 Teddys, in de ganze Wohnung.
Also 1500 Packungen Rietsticken güng jo noch, orrer de Klassiker: Breefmarken...
Ober as Mann un denn 1500 Teddys?

Ach ja, is allens nich so eenfach.

Dat Du mien Leevsten bist...