Fru Klennloff
Wiehnachtserinnerungen

Vertellsel vun Anke Nissen


Bi uns weer an'n Hilligen Avend jümmers Besöök.
Vele Johren keem ok Fru Klennloff, üm mit uns den Avend to fiern. Se weer man 'ne lütte Fru, un se wahn an'n Staakensweg in Oma Petersen ehr Huus.

Wenn wi denn mit 't Singen un 't Eten un 't Bescheern un 't Fiern to Enn weern, denn weer dat mien Upgaav, Fru Klennloff wedder na Huus to bringen.

'n Auto harr een je noch nich.
'n Bus geev dat up Fehmarn dortomalen ok nich.
Fohrradföhren, dat kunn Fru Klennloff nich.
Also: To Foot!
Schöön warm antrecken, un denn man los.

Fru Klennloff hang sik in mienen Arm un den ganzen langen Weg, — Landkirchener Weg, Bahnhofsstraat, Brede Straat, Süderende, Staakensweg, — hett mi Fru Klennloff wat vertellt:
Vun dit un dat, vun fröher un vun gistern, vun ehren Mann un vun ehr Kinnertiet...

Ik glööv meist, dit Vertellen ünner den wieden Himmel vun de Hillige Nacht,
dit Vertellen, dat weer Fru Klennloff ehr Wiehnachten.



na baven