Keen is de Boos tohuus?

vun Heinz Tiekötter


Nu weer dat nich mehr to verhinnern: Hein siene Fro müss in veertein Doog in de Klinik. Wo lang de Behandlung duern sull, stunn noch nicht fast. Hein harr nu twee Weken Tiet, op Huusmann to studeern. Koken kunn he all un mit den Huulbessen un dat Wischdook harr he ok Erfohrung. Wenn dat no siene Wilma gohn weer, denn sallen se man all'ns gau verkeupen, denn se weer seker, se wurr dat Huus doch nich weddererkennen, wenn se ut dat Krankenhuus trüch keem. Hein sien Inwand, dat he no siene eerste Ehe ok 'n poor Johrn alleen trechtkomen is, hett sien Madam mit de Wöör kommentiert: "Dorno seh dat bi di ok ut!"

Een Book mit söben Siegel bliev för Hein de Waschmaschin. Wat droff tosomen dorin, wat farvt und mookt de witten Hemden to schannen? Wat verleert siene Form, wenn dat to hitt wuschen ward, un wat ward nich rein bi lauwarmet Woter? Denn kreeg Hein noch "Chemieünnerricht": Wo geheurt Weekspeuler rin, wo de Opheller un wat vun de Wäsch droff nich bügelt warrn, wenn de Temperaturwähler an dat Isen op Boomwull steiht. Sowat beholl mol allens! Hein müss sik Notizen moken un dat opschrieben.

Liekers weer he bang, dat de Dokters siene Fro in'n Hospitool nich hölpen kunnen, wenn se doch se vör luder Sorgen üm ehr Huus nächtens nich slopen kunn. Dorbi harr Hein allens püker un hett eerst mit dat Putzen opheurt, wenn he seker sien kunn, dat siene Wilma nix mehr to quarken harr. No 'n twee, dree Dogen keem Hein mit allens fein torecht un leev as 'n Junggesell, blots orrnlicher. An'n Morgen stell he noch vör dat Freuhstück de leddigen Beerbuddeln weg un schütt den Aschenbeker ut. He fung all an, jüst so as Wilma, mit de Blomen to snacken, wenn he jem begeet. Beseuk he Wilma, verseker he ehr, dat he allens in Griff harr. Se trock de Ogenbruuen hooch un harr grote Frogeteken in de Ogen. Se bleev jedetmol skeptisch. Dree Weken loter kunn Hein siene Wilma wedder no Huus holen. He hett de Huusdöör opsloten un ehr den Vörtritt loten, bevör he mit ehr Gepäck achteran keem. Se stunn noch op de Deel, as se sik all ümdreih un em segg: "Treck dien Stebel ut, du mookst den Teppich schietig!"

Kiek, dach Hein, nu is dat wedder alleen ehr Huus!


28.9.2018


na baven