Löppt een Hund üm de Eeck

vun Cord Denker


Dat gifft vele Hunnen, grote un lütte. Un dat gifft vele Eecken, junge un ole. Överall gifft dat Eecken, hier un dor. Un dat mag ok ween, dat üm jedeen vun düsse Eecken mal een Hund lopen is. Kann avers ok ween, dor steiht een Eeck, un steiht dor al lang, un is noch nie nich een Hund ümrüm lopen, un de Eeck is dor trurig üm. Peter Wohlleben, de Förster, hett uns dat jo nipp un nau verkloort, dat de Bööm ganz sensibel Wesen sünd. Se föhlt un weet üm den groten Tosomenhang, vun all'ns wat leevt, un se hebbt so'n Aart Gedächtnis över Johrhunnerten. Un mag ween, se föhlt ok sowat as Stolt un Levensglück. Un nu stell di vör, du büst so een Eeck, avers een, üm de noch nie nich een Hund rümlopen is. Un du twiefelst al an di sülben, fraagst nah den Sinn vun dat Leven un findst em nich. Bange Fragen kaam op: Is wat mit mi? Maak ik wat falsch? Worüm mag mi nüms?


Wi Eeckbööm hebbt Charakter, meist sogor Gesichter!

Fragen över Fragen, de sik di lasten op de Seel leegt un di krank maakt. Nienich is een Hund üm mi rümlopen... Ik wünsch di dat vun Harten, dat du feine ole Eeck alsbaldig Besöök vun een Hund kriggst, de widdelsteerten üm di rümlöppt un di dat Geföhl vun Stolt un Minschen-Weert gifft. Du bruukst dat nödig dat een di dat wiest: Dat is good, dat du dor büst!

Man ok de anner Fall is denkbar: Een Eeck, dor löppt nich bloots een Hund den Dag ümto, nee, dor kaamt dörtein oder mehr un pinkelt denn ok noch an den Stamm.

Stell di vör, du büst so'n Eeck, un dien Foot sitt deep in de Eer un du kannst em nich eenfach ruttrecken un de Köter in't Krüüz petten. Se köönt dat mit di maken, un du kannst di nich wehrn. Un för Ingrimm platzt di meist de Borke. Wat schall ik di wünschen? Du muttst di doch wehrn gegen dat, wat de Welt mit di maken will, gegen dienen Will'n. Du kannst di doch nich an't Been pinkeln laten! Du, ik maak di een Vörslag: Wi sünd stark as Eecken, wi laat dat nich mehr mit uns maken, wi treckt nu unse Fööt ut de Eer, wi söökt nu unsen egen Weg un — laat uns nich mehr an't Been pinkeln!


10.4.2021


na baven