Ebbe in de Kass

vun Heinz Tiekötter


All de Johrn hebbt se Dieter bewunnert. He harr dat gröttste Huus in de Stroot. In siene Garoosch stunn twee Autos un so'ne Dunnerbüx vun Harley-Davidson. Sommerdags weer he mit sien Seilschipp op de Ostsee un in Winter leep he mit siene Familje Schie in de Bargen. Keem Dieter in den Kroog, geev dat 'n Runn för alle, un bien Skotspeelen schrief he den Speelstand mit so'n Meisterstück vun Mont Blanc op. Wenn se Köm un Beer drunken hebbt, harr Dieter sien Whisky ut'n Buddel, de bi'n Kröger in Regol stunn. De Buddel harr 'n sülbern Nomensschild, dor stunn "Dieter" op.

Dieter harr wat in de Supp to brocken un de een or anner hett sik wull froogt, woans dat angohn kunn, dat 'n Finanzberoter so veel Geld verdeent. Bi Dieter kunnst du Bedeligungen an Schepen, an lukrative Ünnernehmen or an Fleegtügen, Andele vun Immobilienfonds un "Start-ups" unsowieder keupen. He he harr sülmst 'n ganzen Sack vull dorvun. Hett he de Lüüd jedenfalls vertellt. In'n Kroog geev dat keeneen, de so good de Tosomenhänge in de Weltwirtschop verkloren kunn un so gode Verbinnungen harr as Dieter. Jede twete Satz weer: "Spare in der Schweiz, so hast du in der Not!" Man, wat hebbt se em doch mennichmol bewunnert!

In de letzte Tiet is he 'n beten stiller worrn. He snackt nich mehr so veel vun dat grote Geld; nee, he schimpt eher mol öber Politik un de Gesetzgebers, de em un sien Kollegen dat Leben so swoor mookt. He sall nu haften för den Erfolg, den he verspreken deit un de in siene bunten Prospekte utwiest ward. He mutt nu vertellen, wo veel Provischoon för em rutspringt. Un wenn de Kunnen, no dat de Ünnerschrift ünner de Verdrääg dreug is, in de Gazetten or in Internet wat to weten kriegt, wat he jem nich vertellt hett, denn köönt se in de negsten twee Weken den Verdrag dörchrieten. Harr Dieter op düssen Verdrag all 'n Vörschuss vun de Verdriefsorganisatschoon kregen, denn müss he den trüchbetolen. Op sien Stornokonto is all lang Ebbe un nix mehr to holen. Dat gift en olen Snack: "Koop-manns Good is Ebbe un Floot!" Een kunn marken, dat bi Dieter in de letzte Tiet de Floot nich recht trüchkeem.

Un keem Dieter in'n Kroog, denn he harr ok nich mehr de Spendierbüxen an. De Platz in dat Regol achtern Tresen is leddig, wo he freuher jümmers sien egen Whisky-Buddel stohn harr. De steiht dor nu nich mehr.

Annerlest hett he sien Seilschipp verköfft. Dormit harr he sik blots Rheuma holt, säe he. Un denn stunn mol de Garoschendöör bi em op un de Knatterbüx weer weg. Bi de velen Autofohrers harr em dat keen Spooß mehr mookt, vertell he. De beiden Autos sind in Harvst gegen een brukten Lüttwogen ümtuuscht worrn. Dor güng em dat üm den Umweltschutz. Letzt Johr hett he Fritz, de is Muermann, froogt, wat dat woll meuglich is, in sien Huus ne tweete Wohnung intobuen un wat sowat kosten däe. Un allerwegens hett Dieter vertellt, dat he jo egentlich Groothannels-Koopmann lehrt hett un geern wedder in siene ole Profeschoon trüch wull. He wull sien Weten ut de Finanz-Branche inbringen un söcht 'n neen Bahntje.

In Sommer stunn denn de Meubelwogen vör de Döör. In Vörgorrn steiht 'n Schild vun de Sporkass. Dieter un siene Familie sünd wegtrocken. Jichtenswo fehlt se 'n beten. Annersiet mutt een ok an de Minschen dinken, de freuher mit jemmer ersportet Geld Dieter sien Luxusleben finanziert harrn.

Warren Buffet seggt: "Eerst wenn dat ebbt, kann een sehn, wokeen nookig swemmt!" Een kann ok seggen: "Wenn de Snee smolten is, denn süsst du, wo de Kötels liggen!"


23.10.2017


na baven