Minschen kennt man, rechte, linke,
Bremsers oder ganze flinke.
Besunners groot, besunners lütt.
Mitmenschen finnt man inne Mitt.
Nich jeden Minschen süht man an,
wat he is un wat he kann.
Besunners swoor is't, wenn he naakt,
wieldat ja Kleder Lüer maakt!

De Minsch is up sien Macht bedacht
un wiest sick geern mit gröttste Pracht.

As Minsch is man afsunnerlich,
veel untofräer un wunnerlich.
Meist is dat wat besunners
wo di öber wunnerst.
Je beter as den Minsch dat geiht,
ward he quarkig un empfindlich;
kummt he in Not un Schwierigkeit,
dennso ward he fründlich.
Ick will mi betern, gründlich.
In Tokunft war ick fründlich,
ick will mi goot benehmen —
in Hamborg un in Bremen.

Wer mi nich kennt, de kann mi geern
uck mol nöger kennenlehrn.
Ick bin uck mol bannig grannig.
(Aver Riemels smeden kann ick.)
— Wat man uck deit un wie man sick dreiht,
gifft jümmer Kollegen, de hebbt wat dorgegen.
Veele hebbt dat noch nich sehn,
dat is nich so bekannt:
Schmitt man mi Knüppels mang de Been,
nehm ick se inne Hand.
So süht man ganz dütlich:
Friedrich is nich jümmer friedlich!
Manch Gemüt is ungemütlich,
un veele Nieten sünd so niedlich.

Vun Hans sick nich mehr hänseln laten,
dat hett Elfriede nu beschlaten.
Veel Elfrieden sünd verschieden,
veel mag man besunners lieden.
Mien Elfriede is solide.
Wat all to oft vermissen kannst,
dat is un blifft de Toleranz.

Wer up sien Vördeel geern verzicht,
den söök man mol, den finnst du nich.
De Minsch kann goot wän oder schlecht,
wenn he sienen Vördeel söcht.
Wer bloß sien eegen Vördeel süht,
kriggt bald mit anner Minschen Striet.
Wie geiht de Minsch mit Minschen üm?
Dat is nich selten mehr as schlimm.

Bi alln's, wat man nich weten kann,
fangt man tomeist to glöben an.
Jede Minsch, de is ganz wichtig.
Jede glöövt, he makt dat richtig.
Dat glöövt de Heiden un de Christen
un uck de Ökoextremisten.
Ick heff all annerwo vertellt:
Solang ick leev, besteiht de Welt.
De Welt hett veele Gödder
un denkt, de sünd ehr Redder.
Sünd to veel Gödder, as ick meen.
Dat kann mien Herrgott ganz alleen.
Ick heff dat all jümmer wüsst,
dat mien Gott de beste is.
Ick glööv, ick heff den Öberblick,
ick, Fidi Ehlbeck, Lauenbrück.