Na denn Proost

vun Heinz Tiekötter


Op de gele Press un de Froensgazetten, de miene Fro mit no Huus bringt, bin ik richtig scharp op. Un ik lees de ok; sotoseggen ut Vorsorge. Een mutt siene Abwehr tränieren un jümmers vörbereit sien. Wat in düsse Bläder steiht, dat richt sik jo mehrstendeels gegen uns Mannslüüd. Un miene Fro leest sowat mit grotet Intress. Sünnerlich denn, wenn dat üm vun Akkahol un de Folgen för de Lebber geiht. Se is jümmers öber mienen Dost bekümmert; an mienen Hunger hett se keen Interesse. Se meent, wenn ik so wieder mook, denn kümmt miene Lebber no Amsterdam. Dor ward se denn dormit Diamanten schliepen.

Se hollt mi ständig Vördrääg öber Perzent un Promillje. Dat sünd ehre wedderkehrnden Themen. Männichmol vermengeleert se dor wat. Annerlest stunn in een vun de Gazetten in, woveel Glöös 'ne Fro vun fofftig Johrn un söbentig Kilo Gewicht drinken mutt, bevör dat se 1,4 Promillje Bloodakkahol hett. Un nu holl di fast! Miene Hübsche gläuvt, dat düsse Werte ok för uns Mannslüüd gelllen.

Denn warr ik mathematisch. Eersmol: Ik wääg 105 Kilo, dat sind foftig Perzent mehr as ehre 70 Kilo. As Neegstet: Ik bin 'n Mann un bün mit Beer un Kööm opwussen un groot worrn. Dat fung jo bi mi glieks an, nodem miene Modder mit dat Stillen opheurt hett. Wat ober würklich tellt: Wi Mannslüüd hebbt 'n ruhiget Wesen. In uns Naturell löppt jo allens veel sinniger un utgegleken. Mit düsse angeborene innere Roh blievt wi jümmers geloten. Dorüm köönt wi ok ganz anners mit Akkahool ümgohn. Denn wenn 'ne Fro nervlich in'n Stress is — un dat sind se jo meist —, denn reagiert se anners as 'n Mann, de sotoseggen de Roh för sik pacht hett.

"Nu tüdel man nich; du un geloten, dat passt öberhaupt nich tosomen", meen miene Hübsche, "di sütt man doch op den ersten Blick an, wenn du wat drunken hest." Ik grien in mi rin un swieg, denn güstern obend hett se dat nich markt, as ik ut mienen Hobbykeller keem. Ik kann mi näämlich tosomenrieten.

Mien Snarken in de Nacht heff ik süllmst nich mitkregen. Dorvun heff ik denn eerst an neegsten Morgen heurt, as se mit ehr Fedderbett ünner'n Arm ut de gode Stuuv keem.

"Wokeeen keen Bang vör siene Fro hett, de is gornich verheiroot!"


13.10.2018


na baven