Hett Bayern verlorn?

vun Heinz Tiekötter

An'n Meddeweken, den 20.12., hett Bayern München gegen Dortmund in't Achtelfinool in DFB-Pokool speelt. An düssen Dag stunn ok de U10 vun Auhmööl gegen Veerlannen op'n Platz. Mit den 9-jöhrigen Ole in Storm. Ole is de Jung vun uns Klempnermeister un en utsprokenen Bayernfan.

Kott vör de Halvtiet is Ole vun achtern leggt worrn un full krachend op de linke Siet. As he opstünn, weer sien Ünnerarm broken. De Nootarztwogen bröcht em no Hamborg in dat Hospitool. De Trainer is to dat Öllernhuus fohrt un hett vertellt, wat passiert weer. Ole sien Modder reep ehrn Mann an un suus denn mit den ölleren Broder in dat Krankenhuus.

Ole leeg noch in de Opnohm, as de beiden dor ankemen. Ole weer witt in'n Gesicht un ween. Wat em dat so weh deit, froog sien Modder em. "Nee", kreeg se to Antwurt, "Hüüt speeln de Bayern üm dat Veddelfinool in'n DFB-Pokool gegen Dortmund un ik ligg hier in Krankenhuus un kann dat Speel nich sehn!" Dicke Tronen lepen em de Backen dool.

Denn keem de Dokter, keek sik den Arm an un meen, dat he em wedder henkregen warrd. He trööst den lütten Ole un verspreek, dat dat nich weh dohn ward. He ward scheun slopen, un wenn he no twee, dree Stünnen wedder opwookt, denn liggt he in sien Bett. Un in twee Dogen kunn he all no Huus. Ole ween un froog, wat de Dokter sien Arm nich an'n neegsten Dag richten kunn; hüüt speelt doch Bayern un he harr sik so op dat Speel freit. De Arzt lach un harr Verständnis. Man op düt Geschäft kunn he sik nich inloten.

An'n Obend seet de heele Familje in dat Hospitool un täuvte, dat uns Ole ut de Narkoos opwookt. Denn endlich keem de Krankensüster un hoolt se vun den Fluur in de Krankenstuuv. Ole ward nu langsom to sik komen un glieks opwoken. All stunnen se üm dat Bett rüm, as de Jung anfung sik to reugen. Denn sleih he endlich sien Ogen op, keek in de bedrüppelten Gesichter vun siene Öllern un in dat vun sienen Broder un fung wedder an to ween. He wüss dat Mitleed in de Gesichter nich anners to düden un säe: "Wat schood, nu hett Bayern doch verloorn!"