Luther

vun Karl-H. Sadewasser

Weeßt du wohl, wer hüüt Geburtsdag hett? Na, uns oll Dr. Martin Luther. Vör 525 Johren is hei an dissen Dag in Eisleben tau Welt kamen. An'n Martinsdag, dei hüüt is, hebben siene Öllern em glieks döpen laten.

In Prenzlau in de Uckermark steiht nun al siehr lang ein groot Denkmal von unsen Reformator. Hei höllt dor dei Bibel fast in sien Hand. Dei Botschaft vun Gott sien Leiw — ahn all dat, wat wi können un hebben — de stünn bi em an böberste Stell. Dit groot Denkmal kunnen die Prenzlauer Kommunisten in ein bestimmte Tiet nich af, un sei hebbt Martin Luther heimlich bi Nacht von sienen Sockel stött.

Man de Stadtrat müß em bald wedder up sienen ollen Platz vör de Marienkirch upstellen. Dor steiht Luther nu un wiest all dei Lüüd, dei an em vörbi gaht un vörbi föhrt, up Gott sien Wort hen.

Aver wi hebbt hüüt doch naug annern Kram in Böker, Zeitungen un Kataloge tau läsen. Reckt dat nich ut för uns Leven un Starben?

Nee doch, seggt uns Dr. Martinus, weest man nich tau bescheiden. Tau uns Leven as Minschen un Gott sien Geschöpfe passt goot ok Gott sien Wort so as dit:

Wees nich bang, ik heff di frie maakt, ik heff di doch all ümmer in mien Leiw bi dienen Namen nöömt: Du höörst tau mi, wat ok kümmt.

Dit Wort ut den Propheten Jesaja in 't Olle Testament is wohrhaftig wohr, dor kannst du di up verlaten — hüüt an Luther sienen Geburtsdag un an all diene Levensdaag, bi Geldsorgen un Angst, wat noch allens kümmt. Gauden Dag ok!

Foto: Anke Nissen