Dat kannst mi glööven!
Gägen angaohn

vun Hubert Looschen

To'n Anhören hier klicken:

Lesen deit Hubert Looschen.

Wenn man aale Daoge un Maonde tauhope tellt, dei hei in ein Krankenhuus oder inne Reha verbröcht häff, dann mäöget dat woll bolde drei Johr wäsen. Dat füng mit 19 Johr an. Nao einen schwor'n Unfall köm hei in't Krankenhuus mit 'n paor Schnittwunden. Dorbi wör dat heil schlimmer. Dei Doktor bleew an sien'n Bedde. "Dor mott noch wat wäsen", aohnde hei. Noch jüss frauh naug häff hei market, dat dei Vermalörte sick bi'n Unfall äowergäwen har un dei Lunge vull seet.

Veier Jaohr läöter köm't noch leiper. Hei har einen Unfall mit 'n Motorrad, üm wüdd dei Vörfohrt naohm'. Ein Bein, dat Becken un ein Arm wör'n braoken. "Vör taihn Johr", sä dei Doktor, "harn wi di dat Bein noch affnähmen mösst." Dei Doktors häbbt üm wedder henkrägen. Aower hei markt den Unfall bit vandaoge, nich bloß anne Piene. Twei schwore Unfälle, 'ne ganze Riege Operationen dei Johre d'r nao — dei Mann häff sick immer wedder uprappelt, is nich liggenbläben.

30 Jaohr wieder wüdd hei noch einmaol trügge schmäten. Sien Jungen har 'n Unfall. Dei kann nu nich mehr alleine läwen, brukt alltied Hülpe. Masse Hülpe krigg hei van sien'n Pap'n. Dei weit ja, wat Krankheit bedüürt. "Dat werd nix wedder mit dien'n Jung'n", wüdd den Vaoder seggt. Hei lööt üm nich alleine. Gesund wern kann hei nich. Aower dei Pap'n helpet dagin dagut. Hei dait för üm, wat hei kann. Dei Junge bruk Mam'm un Pap'm äöwer Dag un faoken inne Nacht.

Eines Daoges güng't dann doch nich mehr. Dei Pap'n mössde sülwes wedder in't Krankenhuus, dei Mam'm kunn't nich alleine, kreeg dat nich mehr uppe Riege. Dei Junge is in ein Pflegeheim kaomen. Sei beseuket üm jeden Dag.

Wo kann dat gaohn, sücke schworen Schläge tau verkraften? "Du moss Geduld häbben", häff dei Mann lernen mösst. "Nich naolaoten, du mos d'r gägen angaohn!". Gägen angaohn kanns wörtlick nähmen. Nao Operationen mössde hei dat Gaohn wedder lernen, wäken-, monate-, jaohrelang. Nich liggenblieben, upstaohn! Hei heff dei Kraft dortau fun'n. Hei brukde dat nich alleine. Siene Frau stünd immer an siene Siete, masse Lüe häbbt üm hulpen un för üm bäet. Dorüm kann hei sien Krüüz drägen un immer wedder upstaohn, wenn hei fallt.

Bi us up plattpartu.de finnt man nu utsöchte Bidräge van disse Radiosendung.