Dat kannst mi glööven!
Tied nähmen

vun Diakon Hubert Looschen, Garrel


To'n Anhören hier klicken:


Lesen deit Hubert Looschen.


Dat geiht in use Läwen meist aaltied drock un dröcker tau. Wi hebbt faoken kien Tied mehr för dat, wat wichtig un manges nödig is: för us sülves nich, för annere nich. Man wo kriege wi dat anners hen? Wo kriege wi de Tied tau packen un nich de Tied us?

Lüe denket ja, wenn dei Rente kummp, dann kummp uck dei Tied. Rentner bruukt ja nich mehr Dag in Dag ut alltied tau dei süftigen Tied praot staohn. Ick kenn aower naug Rentner, bi dei is dat ganz anners. Dei läwet nao den bekannten Rentnergruß: Kien Tied, kien Tied.

Lüe hebbt kien Tied. Dat gellt för dei, wecker noch in' Beruf staoht, villicht noch mehr at för dei Rentner. Kien Tied häbben, is dat nich uck wie 'ne Krankheit? Ick mott dit noch, ick mott dat noch. Dat gaiht nich aohne mi. Ick mott hier hen un dor hen. Nich eis nachts kommt se tau Ruhe.

Ick glöwe ja: Tied har wi naug, wi mäöt se us bloß nähmen, wi mäöt se gaut bruuken. Wat di wichtig is, dor häss immer Tied för. Dat häbb ick lernt van Joschka Fischer, hei wör ja maol use Außenminister. Hei is anfungen, för'n Marathon tau trainieren. Do wör hei all in't Amt. Egaol wor hei wör un henflög — hei har alltied siene Loopschauhe in'n Kuffer d'r bi. Jeden Dag moss twei Stunden loopen, sons werd dat nix. Hei häff dat wücklich schaffet, dei 42 Kilometer.

Tied häbb wi naug, wi määt se us bloß nähmen.
Tied för dei Arbeit, änners häss kien'n Erfolg.
Tied taun naodenken, dat bring neie Kraft.
Tied tau spälen, dann bliws jung.
Tied taun läsen, dann kanns klauk weern.
Tied üm fründlick tau wäs'n, dat bring di Glück.
Tied för dei Leiwde, dat bring richtige Fraide.
Tied för dei Fraide, dat is Musik för dei Seele.
Tied taun bäen, dann is Gott dichte bi di.

Tied häbb wi nauch, wi mäöt se us bloß nähmen. Dei Engländerin Cicely Saunders wör Krankenschwester un Ärztin. In dei 60er Johrn häff sei in London ein Hospiz gründet. Van ehr kummp disse Satz: Dat gaiht nich dorüm, dat Läwen mehr Daoge tau gäwen. Dat gaiht dorüm, dei Daoge mehr Läwen tau gäwen.

Leiwe Tauhörerinnen un Tauhörer! Nähmt jau Tied vandaoge. Gäwet den Dag 'n bitken mehr Läwen.


Översicht över de Reeg
"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


26.2.2017


na baven