Wiehnacht

Levenssaft

vun Thomas Baltrock. Plattdüütsch vun Anke Nissen


Dat Bild köönt Se dör Anklicken vergröttern

Uns' Fründ is krank. He mütt veel Pien uthollen. Annerletzt fraag he, wat een nich enerwegens Levenssaft köpen kunn. ——
Mi füll en Text vun Pastor Thomas Baltrock in:

Wiehnachten, dat findt statt...

Wiehnachten, dat findt statt, ok wenn een överhaupt nich in Wiehnachtsstimmung is, ok wenn een de rechte Sinn vun dit Fest ut de Seel gahn is. Wat nu?

Wenn dor noch wat to retten is — un dat noch wat to retten is, jüst dat höört ja to de Wiehnachtsbottschaft —, denn schull een den Advent as Tiet to'n Vörbereiten nütten: 24 Daag to'n Nadenken över dat, wat würklich wichtig is, wat dat bedüden kunn, dat Gott Minsch worrn is.
För den Fall, dat diss Eck in de egen Seel so utdörrt is, dat dor gor nix mehr wassen will, hett dat olle heidnisch Orakel vun Delphi ene Antwort vun depen Sinn:

Tempel

In't drütte Johrhunnert na Christus fragen de Inwahners vun Nizäa, wat se denn noch Apollo Opfer bringen schullen, wo dat doch mit de olle Religion so bargdal güng — un de Pythia, de "Seherin" vun Delphi, de sä:
"Ji köönt dat Orakel vun Delphi kenen niegen Atem inpuusten. Över de lange Tiet is dat swak worrn; dat Orakel wull dat Swiegen, ok, wenn't gor nich to't Prophetische passt. Man, den Apollo schullen ji Opfer bringen, as jümmers. Dat is siet Oldingstieden so, dat is Bruuk".

—— Wenn Gott still swiggt, denn weet he, wat he deit. Man de Minsch sall liekers dat, wat Bruuk is, Wiehnachtwieder plegen. Dor gifft dat twee Gründen för.

To'n eersten:

Ok, wenn een dat Ritual gor nich versteiht, dat kann helpen över de Festdaag to kamen, dat kann stabiliseern — un dat is nich wenig.

To'n tweten:

Christliche Rituale, Feste un Bruukwiesen sünd as en Regentunn in'n Goorn. Dat gifft Tieden — so as in letzten Sommer —, dor fallt keen Regen. Smitt een nu sien Tunn up den Sperrmüll, denn geiht he lerrig ut, wenn't wedder regent.
Un regent hett dat bet herto noch jümmers — enerwegens.


Thomas Baltrock, Anke Nissen

20.12.2003


na baven