Dat kannst mi glööven!
Freer is dat Wäsen van Religion

vun Peter Kossen


To'n Anhören hier klicken:


Lesen deit Peter Kossen.


Dei Imam in 't Papamobil — dat Bild güng üm d' Welt! Vör tweiunhalf Jaohr hett Paopst Franzikus Länner in Aofrikao besöchd, uck dei Zentralafrikanische Republik. Dat Land is ut'nännerräten un ganz anne Grund, piert van ein Börgerkrieg. Wecke seggt, dat is 'n Globenskrieg. "Dat is so nich waohr; Muslime un Christen köänt gaut un in Freer tauhope läben", so betügt dat siet Jaohrn un oahne d'bi tau vemäuen dei Erzbischop van d' Hauptstadt, dei heit Dieudonné Nzapalainga, un dei muslimische Imam Tidiani Moussa Naibi. Dorför sünd dei beiden mit den "Aachener Friedenspries" utteiket wudden. In d' Moschee van d' Hauptstadt hett Paopst Franziskus seggt: "Wi Christen un Muslime sünd Süsters un Bräuers. Wi möät us dorför ankieken un us so benähmen. Wi wät wisse, dat dei … Gewalt, dei ehr Land in Unstür bring, sick nich stütt't up wücklich fromme Grünne. Wecke segg, hei glövt an Gott, dei mott ein Mensk van Freer wän… Gott is Freer, Salam!"

Muslime, dei ehrn Koran kennt, sünd kiene Gefaohr för den Freer, Christen, dei ehre Bibel nich kennt, all eiher. Uck in Düütschland, wor wi all väle Jaohrn in Freer läbet, sünd Mensken bange vöreinänner. Frömde un Frömdes maokt unseker. 'n frömden Globen bäter vestaohn — dat mach woll lange düürn. Doch wecke sick dei Maihde maokt, kann wat gewaohr weern — aower dei ännern un aower sick sülwes. Hett dei frömde Globen 'n Gesicht inne Naoberschup, dann gaiht et all 'n masse lichter, sünd dei eiersten Wöör man uttuschket. Äten un drinken, schnacken un taulustern, läsen un neischierig wän — so kump man sick Träe bi Träe intaumeute. Manchet passt nienich tauhope, vandaoge nich un morgen uck nich — un kann uck nich liektrucken weern. Dat, wat dann gaiht, is: in Freer näben'nänner läben — nich mehr, aower uck nich weniger!

Religion lehrt Mensken, dei Waohrheit tau seuken un tau betügen. Dei Waohrheit is dei Leiwde. Jesus segg: "Sälig, dei kiene Gewalt bruken daut, sei schölt dat Land arben… Sälig, dei Freer stift't, sei weert anschnackt at Kinner Gottes." Kinner Gottes, Süsters un Bräuers — Religion sütt deiper, glövt an dat Göttlike in jeden Mensken. Religion heit: "Wäst man nich bange! Gott holt dei heele Welt in siene Hannen. Gott maokt et gaut mit di, Gott maokt et uck mit dei ännern gaut!" Dat, wat Religion utmaoken deit — un nich bloß use Religion —, is Freer!



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


4.11.2018


na baven