Dat kannst mi glööven!
"Kien Freer oahne Gerechtigkeit"

vun Peter Kossen


To'n Anhören hier klicken:


Lesen deit Peter Kossen.


"Kien Freer oahne Gerechtigkeit, kiene Gerechtigkeit oahne Vergäben." Dei hillige Paopst Johannes Paul II. hett dat segg.

Kien Freer oahne Gerechtigkeit… Immer weer un köns noch hört wi d'van, dat Arbeitslüe hier bi us un ännerswo schwäörste Arbeit daut un dorbi nich tau ehr Recht kaomt. An dei 20.000 Kerls un Fraulüe ut Rumänien, Bulgarien, Polen, Ungarn… sünd in 'n Nordwesten at "Werkvertragsarbeiter" anhüürt. Sei warkt in d' grooden Schlächtereien, up 'n Bau, in 'n Metallbau, in d' Hotels, at Faohrer bi d' Paketdeensten, in 't Mauer un ännerswo. Väle d'van sünd nich affsichert off anstännig betaohlt. Schwäörste Arbeit werd mit minnste Löhne afdaon. Siet Jaohrn is dat so un jümmers noch wieter. För 'n Schlaopplatz in 'n Rottenlock wert d' 300,- € van 'n Hungerlohn afftrucken. Is dei Arbeitgäber 'n Subünnernähmer ut Rumänien, dann bedüürt dat: Kien Geld bi Krankheit! Urlaubsdaoge: Giff et nich! Dei Not wett reuklos uutnützt. Dat sünd Sklaoven! 'n Justizbeamten vetellde mi: An wecke Stäen hebbt dei Arbeiters twei Chips inne Taschken, wor de Arbeitstied mit fastehollen wedd: Mit den eiersten maokt sei dei eierste Schicht un mit den annern dei nächsten acht Stünnen: Dei tweite Schicht för 'n Masse weniger at 'n Mindestlohn off för nix, för ümzüss. Dann betaohlt sei noch för den Bus un för dat Warktüüg. Van 'n "Mindestlohn" bliff d' so nich vääl van äöwer.

"Laot den Kossen man schnacken…", wett d' seggt. "Wat kümmert dei sick ampait dorüm?" Man weit d'van un lett kriminelle Subünnernähmer gewährn. Wat is d' all schnackt wudden un vesproaken worn, man veännert hett sick nich vääl! Üm dat d' wecke den Hals nich vullkriegen köänt, wett dei freie Mensk taun Sklaoven van Gier un Giez. Junge Wichter uut Rumänien un Bulgarien wert d'her luurt mit Utsicht up Arbeit un hier dann dwungen, up 'n Strich tau gaohn. "Fleisk is Fleisk."

Un glieker Tied wedd de Natur verneielt. Nich bloß in Südollenborg wedd dat Grundwaoter minner, off is wecken Stäen vegift't mit Nitrat un Antibiotika. Paopst Franziskus segg: "Dei mensklicke Ümwelt un dei natürlike Ümwelt gaoht tau d' glieken Tied anne Grund, un wi köänt dat Upslieten un Vedelgen van d' Ümwelt nich recht angaohn, oahne dei Grünnen antokieken, wecke tauhopehangt mit dei Leipkeit in 't mensklicke Mit'nänner." Jao, dor is gewaltig wat in Unstüür! Kien Freer oahne Gerechtigkeit, kiene Gerechtigkeit oahne Vegäben!



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


28.10.2018


na baven