De Kark un de Schaap orrer de Schaap un de Kark

vun Rudi Witzke



Ut en Katakombe

Letzt snackte ik mit unsen Öllerpaster. Ik fröög ehm, wat ehm de Nordkark al maal in de Mööt kamen weer. Hei un ik dään so, wat wi ierst maal nadenken müssten: "Nordkark"?

Wat is de Nordkark egenlich? Wi wüssten woll, dat dat de karklich Organisatschoonsform is, an de wi nu uns Karkenstüür to tahlen harrn. Vördem weer dat de Evangeelsch Kark Norelbien un vördem de Landeskark Eutin. Wat hett sik vun unsen Bischof Kiekbusch vun de Landeskark bit nu hen ännert?
Denn fööl mi en Steinhaugerarbeid von vör minnst 2000 Johr in:


De Herder kümmt na de Söök trüüch mit sien Schaap.

De steiht in Caesarea in Israel, un dortau höört de Text vun't verlorn Schaap. De Schäper steiht as Bild vun Gott. De Schaap staht för alle Minschen. Dat Schaap, dat sik verbiesterte, is en Bispill för all de Minschen, de vun ehr Weeg afkamen sünd. De hebbt Schuld up sik laden. De sünd biester gahn. Un faken weiten se nich, woans se trüüch finnen daut. —

Gah mi doch loos, dat is so en Glieknis von Jesus un so. Dat hannelt vun so en dickköppig Deert, dat in de Bargen sien eigen Weeg sööcht harr.
Wenn wi nu all so över eenanner denken, sünd wi fix alleen; denn elkeen versööcht dat maal mit en eigen Weeg. Wenn wi up de Snuut fallt, so is dat alleen uns Schuld.

Wi warden uns afmarachen un ehm ut de Bargen halen?! Wi 99 ornlichen Schaap warden in Gedüür töven, bit de Schäper mit dat krötig Deert trüüch kümmt?! Ha! Un villicht schallen wi dat störrsch Deert ok noch helpen, den Weg na Huus to finnen? Nasicht schalln wi hebben?!

Wat hett dat Glieknis vun Jesus mit uns Anfangsfraag to daun? Is Se de Nordkark schon maal in de Mööt kamen? Up de Söök na Verlopene?
De Herder weit up den Weg na de Schaap ehr Hürden, wat all up den rechten Weg sünd —— all vun de 100 Schaap.


Missionskutter Elida. Foto: Holger Putz. — De Bibelvers Johannes 3,16 up de Seils heet: "Denn so leev hett Gott de Welt, dat he sienen eenzigen Söhn hergeven hett, dat all, de an em glöövt, nich verlaren gaht, sünnern dat ewig Leven hebbt."

Vun Hiddensee bit hen na Lauenburg an de Elv un Randow-Ückermünn un Burg up Fehmarn hett uns Herder en Weid för uns, die Liddmaten vun de Nordkark. Wenn dat Avend ward, sünd wisslich nich all Schaap up den rechten Padd. Nich all Liddmaten hebbt frischen Maut to't Leven. Achter tautrocken Gardinen warden Tranen weent. Dat weiten de Herders in ehr swatten Röck ganz gewiss. Wi bruukt miehr Neegstenleiv.

Neegstenleiv is aver bloots wat för den Minschen, wenn Barmhartigkeit dortaukümmt. Un dor mutt ik maal uptellen, wat doon warden mutt: Hungrige spiesen, Frömde Harbarg geven, Nackige inkleden, Kranke plegen, Insparrte besöken, ole Knacker nich för en Last hollen, Dode in Iehren begraven. Mal in Hochdüütsch wieder: "Unwissende lehren, Zweifelnden recht raten, Irrende zurechtweisen, Trauernde trösten, Unrecht ertragen, Beleidigungen verzeihen, für Lebende und Tote beten.
Und auf ein Problem muss besonders hingwiesen werden: Wie gehen wir barmherzig mit dementen Brüdern und Schwestern um? Ich weiß nur einen Rat. Geduld tut euch not, ihr Christenschwestern und Christenbüder."

Laven mutt een de Karken mit ehre velen Anbotten. Aver is an den Lahmen dacht, an de Kranken, wenn de Karkengemeind wat anbeiden deit? Villicht sitten de to Huus, de dat jüst nödig hebbt!

Ik wull hier nu en Bild insetten, dat uns de Böveren vun de Herder, de Bischööf, wiesen deit. So kunnen wi beder weiten, vun wokeen wi Hülp kriegen kunnen. Wi kunnen weiten, woans de Bövere utsüht. Dat kunn ja maal wunnersaam taugahn un een vun de "Böveren" kümmt in en Huus. Ik finn aver keen "friegeven" Bild. Up alle Fotos, de ik mi anseihn kann, hett de Kark dat Copyright.

Laat ik dat as en Radel stahn, wo uns Sprengel un ehr Bischöpp heiten. Villicht gifft dat ja een vun juuch, de de herseggen kann. In mien Dörp gifft dat veer Pastoors. De schuven ehr Rebett maal beten so, maal so. Ik wüßt nich nau, wokeen uns Pastoor is, wenn ik nich den Öllerpastoor fraagt harr.

Uns Landsbischop hett över al de Weeg wiest. In en Predigt hett hei seggt: "Die Kirche ist nur Kirche, wenn sie für andere da ist — dieses prophetische Wort von Dietrich Bonhoeffer war immer lebendig in der Geschichte der Pommerschen und der Mecklenburgischen Kirche — und auch in Nordelbien. Es bleibt Verpflichtung für uns alle: Nordkirche ist Kirche für andere! Dienende Kirche, diakonische Kirche. Eine Kirche, die die Menschen im Blick hat, die auf Hilfe angewiesen sind. Die auch an Strukturen arbeitet und sich einmischt. Kirche, die für andere da ist, weil Gott für uns da ist."

Wo Recht hei hett! Ik glööv, wenn een aver nu glieks un upsteed Hülp bruukt, wat maak ik denn? De mehrsten Karkendören sünd afsloten. Un wenn nich, denn is keen Pastoor in sien Kark. Mien Döör, glööv ik, is nich slaten. Dor gifft dat aver ok villicht een, de den Sökenden sien Handy pumpt. Un an't anner Enn? Dor höört he en Telefoonslööp un den Troost, dat de neegst friee Steed för ehm is. Un denn kann sien, dat de Stimm ut'n Handy wat vun "www.de-kark-deit-mi-weh.de" seggen deit.

Een Pastoor ut ole Tieden hett maal seggt, en gauden Herder erkennst nich an de groten un klauken Wöör in de Predigt, den erkennst an de aflopen Schauhsahlen. Klauke Wöör vergittst wiss, wenn di aver een straakt, wenn du huulst, dat deit di lange Tiet gaud.


De gaude Harder. Fresko ut en Katakombe

Ik düüd dat allens so ut: De Kark is för alle dor. De Kark mütt aver to de Mööhsamen gahn. Is villicht beten wat utverschaamt, wenn ik segg, en Prediger hüüt mutt nich na grote Vörbiller ut de vergahn böösordig Tieden gahn un ehr Wöör ziteern. Sien Daun in Jesu Nafolg tellt. Un hei mutt so an dusend Upwossene in sien Karkspill bi Naam kennen un wo dat se geiht.

Dat Is keen Kinnerkraam, wenn ik segg: "Jesus, gah vöran up de Levensbahn." Un denn segg: "Ik kann alleen nich gahn, nich een Schridd."

Ik wünsch mi "En Kark ünnerwegens!", wo Minschen ünnerwegens sünd. En Kark, in de Minschen Minschen begegen. Un dat mi en christlich Brauder orrer en christliche Süster in de Mööt kümmt, wenn mi dat Leven to swoor schient. Weer schon gaud, wenn dat en Pastoor weer, de Tiet för mi hett, ok noch in de kamen Daag. Ik weit wiss, dat ik ok faken en verlorn Schaap bün, dat Gedüür un Hülp bruukt. Un ik krieg Hülp. Aver nich vun de Nordkark.

Vun de Nordkark kümmt de Hülp un de Bistand nich, ehrder vun Christenbräuder un Christensüstern. Dat Hülp vun de Nordkark kümmt, ward wiss noch kamen, wenn dat na de Wöör vun den Landesbischop geiht. Un wenn dat so is, denn sünd de Nordkark un ehr Liddmaten tosamen up'n rechten Padd, wenn de Kark up'n Weg na de Schaap is. — Un wenn nich?


Foto Karktoorn: Ewald Eden
18.5.2014


na baven