De Grönauer Kapell. Teknen vun Jürgen Hagen

Da kannst di to verlaten

Andacht in Grönau an'n 14.September 2008, hollen vun Pastor i.R. Joachim Siemers


Vörweg — to 'n betern Verstahn — en poor Versen ut Kapitel 1. Paulus schrifft:
Gott sien Herrlichkeit in Christus
Siet dat ik vun ju Globen an den Herrn Jesus un vun ju Leevde to all de Christen höört heff, holl ik nich up, för ju to danken. Un ik vergeet ju nich, wenn ik beden do. Ik beed to Gott, unsen Herrn Jesus Christus sienen Vader; em höört de Herrlichkeit. He müch ju den Geist geben vull Weisheit, de ju klor maakt, wat sünst verborgen is, un de ju helpt, em richtig to kennen.

De Apostel vermahnt to Eenigkeit
Un nu vermahn ik ju as een, de an den Herrn bunnen is: Richt ju Leben so in, as sik dat för Christenhören deit. Gott hett ju doch beropen. Weest demödig un sachtmödig! Hebbt Geduld! Verdräägt ju in Leevde! Streevt dorna, dat ji in enen Geist tosamenholen doot un hollt Freden mit'nanner. Dor is een Lief un een Geist, so as ji beropen sünd in een Höpen. Dor is een Herr, een Globen, een Dööp. Dor is een Gott un Vader över all de Minschen. He is Herr över all, un he schafft dörch all, un he wahnt in uns alltohoop.

Glaubwürdigkeit, Wahrheit nach Wikipedia
Glaubwürdigkeit, Wahrheit nach Wikipedia

Leve Frünnen,

in dissen Text sünd wohrhaftig starke Wöör, se stellt teemlich hoge Anspröök — in duppelte Sicht:

Se wüllt uns anspreken un Moot tospreken, avers ut ehr höört wi ok düütlich enen hogen "Anspruch" an uns Christen. Dat geiht üm den Globen an Gott un üm den Herrn, na den wi uns benömen dörvt: Jesus Christus.

Wat is denn na de Tügen vun dat nie Testament dat allerwichtigste an den christlichen Globen? Etwa dat wi all desülvige Theologie hebbt mit all de velen Globenssätze, dat wi de "richtige" Lehre för alle Minschen to 'n Gesetz maken, so dat wi keeneen Fragen un Twiefel hebben dörvt, dat wi uns denn vun Minschen de anners glöövt as wi, afgrenzen un de den na uns Meen eenzig richtigen Globen intrichtern wüllt?

Glaube nach Wikipedia
Glaube na Wikipedia

Nu, wenn ik dor över nadenk un na en Antwort söök, de mi in mienen ganz persönlichen Globen helpen kann, denn kiek ik mal in 't Evangelium: In de Geschichten, in de Jesus mit Minschen vun 'n Globen snackt, wo he ok welk Kranke un Vertwiefelte heilt un trööst hett. Dor fallt mi up, dat he disse Minschen gor nich na ehren Globen fraagt. Ik meen, sien Theologie heet wohl veelmehr:

Unse Vadder, de Hillig Gott, hett uns all as siene Minschen leev. Vun siene Gnaad un Gedüür hebbt wi uns Leben.

Jesus seggt:

"Ik bün dorto kamen, dat ik vun de Wohrheit tügen sall."

Dit Woort "Wohrheit" ut de hebräische Spraak is avers in uns Spraak nich eenfach so to verstahn as: "objektiv, einzigrichtige, absolute Wahrheit". Dit Woort kümmt veelmehr vun dat hebräisch "Ämät" orrer "Ämunah", un dat bedüüdt "wohrhaftig", "truu".

Blots een is vun Anfang an truu un wohrhaftig, nämlich Gott alleen. Un so geiht dat denn bi Jesus sein "Wohrheit" nich üm hoge Philosophie sünnern toeerst üm Vertruun un Leevde: woans uns Herrgott to uns Minschen un sien ganze Schöpfung stahn deit un wi Minschen to em un to uns.

Tovertruun un Leev. Digitalbild R.Witzke
Tovertruun un Leev. Digitalbild R.Witzke

Ut den Wortstamm "ämunah" kümmt ok dat "Amen" bi Jesus un in uns Beden, un dat köönt wi an 't besten up Plattdüütsch översetten mit "kannst mi glöven" orrer "kannst di to verlaten".

So is denn Globen för uns Christenlüüd dat Tovertruun to Gott un sien Leevde, wiel dat he uns toeerst leev hett, un dat he uns totruut, sien Leev — so goot wi köönt — wiedertogeven an de Minschen, de mit uns leevt.

Dorto much Gott uns alltohoop sienen Segen schenken.

Amen.


1.3.2009


na baven