Leven in de lütt Kapell in Grönau
vun Karl-Heinz Nissen

De Wegekapell in Lütten Grönau bi Lübeck
Kapell in Grönau. Teknen vun Jürgen Hagen

Den helen Sommer - vun Pingsten bet Oorndank - elkeen Sünndagmorgen Klock negen, warrt sungen un plattdüütsch Andacht hollen in de lütt Kapell in Grönau.

Disse Andachten, de hebbt en egen Gemeen funnen. De Kapell is meist vull, männichmal ok övervull. De Bischof höllt mal de Andacht un de Propst. De maakt dat denn up hoochdüütsch, man mehrstendeels is Plattdüütsch anseggt. En ganze Reeg vun Pasters köönt dat, dorto Lüüd, de keen Paster sünd. Elkeen Sünndag snackt en anner, un meist sünd dat Maten vun uns' Gill, de "Plattdütsch Volksgill to Lübeck e.V.".
West-Ansicht vun de Kapell
Nordoost-Ansicht
West-Ansicht
En Orgel hebbt wi nich in de lütt Kapell un dorüm sitten baben, up de Empore, Jürgen Hagen un dat Ehepoor Leutz un spelen Cello un Fleit. Un denn warrt sungen! De lütt Ruum is vull dorvun.
Lütt is he würklich, de Ruum, graad 9 m lang. Dat hett enen Grund: Mehr weer nich nödig. Fröher geev dat 'n lege Krankheit, dat weer Utsatz. Lüüd, de disse Krankheit harrn, müssen alleen leven, keen anner dörv mit ehr tohoop kamen. Dor wörrn Hüüs för inricht. So geev dat an de olle Soltstraat vun Lübeck na Lauenborg fiev so Hüüs, de St. Jürgen-Hüüs. Een dorvun hett so bi 1280 rüm de "Ridder Volmer vun Grönowe" buut, 1409 is de Kapell dorto kamen.
Lübeck üm 1650

In Lübeck stünn dat St. Jürgen-Huus bi't Möhlendoor, dat Öllst weer in Schwartau (de St. Georg-Kapell is hüüt noch dor) un in Travemünd' harr dat Huus sienen Platz an de Siechenbucht. De Ritter St. Jürgen, ut Holt sneden, steiht in Travemünd' in de Kirch.

1423 hett de Stadt Lübeck dat Grönauer Huus mit de Kapell un den Hoff up de anner Stratensiet köfft, man nich dat Ackerland dorto.
As de Krankheit so in't 16. Johrhunnert verswunnen weer, dor is dor en Armenhuus inricht worrn, söß Betten för Fruuns, söß för Mannslüüd. Dat weer so bet 1929.
Denn hett dat Huus de "Ober-Realschool to'n Dom" tohöört. Hüüt is dor en Frietiet-Heim vun uns' evangelisch Kirch in.
Sükenhus un Kapell
Dat Portal mit Propst Lukas
 Armenhus

In de lütt Kapell is männich Kunstwark to sehen.
Man een Saak, de steiht hüüt in't St. Annen-Museum, dat is de "Grönauer Altar". De is heel breet un hooch un bi 1430 rüm ut Holt sneden. In de Aegidienkirch (Tilgen-Kirch) harr he sienen Platz. Denn hett sik de Mood, de Gesmack ännert, de Altar gefüll de Lüüd nich mehr. St. Aegidien kreeg enen annern [den, de hüüt noch dor steiht]. Man, wohen mit den ollen? Vörslag weer, em na Grönau to bringen. Nee, keem dat dorgegen, för so'n oll Dings noch Geld utgeven för dat Henföhren, nee, dat keem nich in Fraag. Dor is een vun de Vörstehers upstahn un hett seggt:
"Dor buten wahnt olle Lüüd, un dor hett ok en ollen Altar sienen goden Platz. Vun den Fuhrlohn övernehm ik de Hälft." Un so is de schöne Altar na Grönau kamen un hett dor stahn bet in uns' Johrhunnert.
De Altar, de dor nu steiht
De Binnenruum - bloots 9 Meter lang
Krüüzigungsgrupp

Un noch wat gifft dat in de Kapell vun Lütten Grönau ut de olle Tiet, un dat findt wi Dat Weihwaterbeckenanners in de groten Kirchen vun Lübeck nich mehr: Dor is an de Wand noch en richtig Weihwaterbecken.
Up den Altardisch in de Kapell liggt en wunnerschöön Antependium, dat is ut uns' Tiet. Dor hett Christa Ahlborn mit vele lütte Krüüz-Stiche en fröhlich Wisch mit Gras un bunte Bloom up stickt.

De Hoff-Stell, up de anner Siet vun de Straat, stünn lerrig un weer recht wat verkamen. Nu hett Herr Kohnert dor enen Kroog ut maakt, dat gifft to eten dor un'n goden Pott Kaffee, en kann ok Wust un Kääs kriegen. Kieken S' man mal rin!
Lübeck un sin Engel (in'n Vörrergrunn rechts)


na baven