Leven in de lütt Kapell in Grönau De Wegekapell in Lütten Grönau bi Lübeck |
||
Den helen Sommer - vun Pingsten bet Oorndank - elkeen Sünndagmorgen Klock negen, warrt sungen un plattdüütsch Andacht hollen in de lütt Kapell in Grönau. Disse Andachten, de hebbt en egen Gemeen funnen. De Kapell is meist vull, männichmal ok övervull. De Bischof höllt mal de Andacht un de Propst. De maakt dat denn up hoochdüütsch, man mehrstendeels is Plattdüütsch anseggt. En ganze Reeg vun Pasters köönt dat, dorto Lüüd, de keen Paster sünd. Elkeen Sünndag snackt en anner, un meist sünd dat Maten vun uns' Gill, de "Plattdütsch Volksgill to Lübeck e.V.". |
||
En Orgel hebbt wi nich in
de lütt Kapell un dorüm sitten baben, up de Empore, Jürgen
Hagen un dat Ehepoor Leutz un spelen Cello un Fleit. Un denn warrt sungen!
De lütt Ruum is vull dorvun. Lütt is he würklich, de Ruum, graad 9 m lang. Dat hett enen Grund: Mehr weer nich nödig. Fröher geev dat 'n lege Krankheit, dat weer Utsatz. Lüüd, de disse Krankheit harrn, müssen alleen leven, keen anner dörv mit ehr tohoop kamen. Dor wörrn Hüüs för inricht. So geev dat an de olle Soltstraat vun Lübeck na Lauenborg fiev so Hüüs, de St. Jürgen-Hüüs. Een dorvun hett so bi 1280 rüm de "Ridder Volmer vun Grönowe" buut, 1409 is de Kapell dorto kamen. |
||
In Lübeck stünn dat St. Jürgen-Huus bi't Möhlendoor, dat Öllst weer in Schwartau (de St. Georg-Kapell is hüüt noch dor) un in Travemünd' harr dat Huus sienen Platz an de Siechenbucht. De Ritter St. Jürgen, ut Holt sneden, steiht in Travemünd' in de Kirch. 1423 hett de Stadt Lübeck dat Grönauer Huus mit de Kapell
un den Hoff up de anner Stratensiet köfft, man nich dat Ackerland
dorto. |
||
In de lütt Kapell is männich Kunstwark
to sehen. |
||
Un noch wat gifft dat in de Kapell vun Lütten
Grönau ut de olle Tiet, un dat findt wi anners
in de groten Kirchen vun Lübeck nich mehr: Dor is an de Wand
noch en richtig Weihwaterbecken. De Hoff-Stell, up de anner Siet vun de Straat, stünn lerrig un weer recht wat verkamen. Nu hett Herr Kohnert dor enen Kroog ut maakt, dat gifft to eten dor un'n goden Pott Kaffee, en kann ok Wust un Kääs kriegen. Kieken S' man mal rin! |
||
|