Wees fief Minuten still
21. Juni


Andacht vun Heinrich Giesen, in Platt bröcht vun Marlou Lessing

Dorüm nehmt sik ünnernanner op, liek as Christus juuch opnahmen hett, Gott to laven.

Römer 15, 7

As'n Regieanwiesen steiht dat dor. As wull Paulus de Privaathüüs vun de versprengte Gemeen as heemlich Nootquarteer anbeden. Illegal, in'n Ünnergrund, schulln se wiedermaken, un een schull bi den annern Ünnerslupp finnen.

Denn harrn wi en goden Grund, den Text as tiedbedingt butenvör to stelln, denn vundaag bruukt wi ja keen Tarnen nich mehr. Nee! Nich butenvör stelln! Wi hebbt den Sprook bitter nödig, denn de Gottsdeenstbesöök an'n Sünndagmorrn alleen langt doch nich. Gemeen geiht maandags wieder. Dröfft wi wirklich acht Daag lang töven, bet 'n sik weddersüht? "Nehmt sik ünnernanner op."

Man wi pickt uns de Korinthen ut den Koken, wi wählt ut. Wi laadt bloots de to uns in, mit de wi uns good verstaht. De op uns Wellnlängde liegt.

Weern wi denn op Jesus sien Wellnlängde? Weern wi em so sympaathsch? Hett he sik dorüm entslaten, uns optonehmen? Gott hett uns doch in em, in Christus, in sien Leevde eerst moi maakt, annehmbor, opnehmbor.

Woso nehmt wi de annern nich op? Wi schulln doch bedenken, dat wi sülven opnahmen woorn. Nehmt ehr op! Christus hett dat doch mit uns ok daan. Gemeen deit noot!

O Gott un Herr, giff, dat uns Huus för all apen blifft. Du hest uns opnahmen. Laat uns annere nu ok opnehmen. Wies du uns, wokeen.


19.6.2016


na baven