Wees fief Minuten still
8. Juni

Saul sehg un mark, dat de Herr mit David weer.
Dor kreeg Saul jümmers mehr Angst vör David,
un Saul wörr Davids Fiend för alle Tiet.

1. Samuel 18, 28-29, Platt na Karl Emil Schade

David sülven geev gor keen Grund, dat een Angst vör em kriegen kunn.
De Kirch sülven gifft keen Grund, ehr fiendlich gegenöver to stahn.
De twölv Lüüd sülven — de mit de Predigt vun dat Evangelium as Apostel dörch de Landen trocken sünd — maken de Welt nich unruhig. Man dat Gott mit ehr weer, dat hett de Welt nervöös maakt, dat hett Minschen to Hass un Verfolgen dreven.

Dissen Hass köönt wi nich utwieken. Up dissen Hass köönt wi uns ok nix inbillen. Dat is jümmers de Meister, de hasst warrt. Dat is jümmer Jesus Christus sülven, de verfolgt warrt. Dorüm bruukt wi uns nich to Wehr setten. Dorüm bruukt wi ok nich för uns intreden. Wat em passeert is, is uns Utsicht.

Wi wüllt uns ok nich bi Gott besweern. De Weg in de Nafolg geiht jümmers över Golgatha. Dat is de normale Weg. Dor is nix besünners bi.

O Gott un Herr, vergiff, dat wi oft falschen Freden söökt
mit de Welt, de dienen Söhn nich in Freden leet
un dorüm ok uns den Freden nich günnt.
Bewohr uns nich dorvör, dat wi minnacht' warrt.
Bewohr uns aver dorvör, dat wi minnachten doot.
Denn nich uns alleen hest du leev, nee, de annern ok.
Ok, wenn se dat sülven nich wies hebben wüllt.
Help ehr, dat se dat klook kriegt, an de Ort, as wi di nafolgt.