Hmm...Schinken...
...mi löppt dat Wader in'n Mund tosamen!

vun Günter Weber


Ne, wat fünn ik dat doch lecker, as ik disse Dag bi een Bild ankeem, wat mi ok ümmer noch an mien Jugendjohren denken lett.

So eenen Schink harren wi ok in uns Röökerkamer, den hett ja domaals in jedes Huus geven. Un schlachten deden wi ja nachher, as die Russen weg weeren, jümmer. Grootvader kreeg bi de beiden Gumprechts so in September een lütt Farken.

Och lütt Swien, wenn't Schinken geven schall, geiht't di an't Leven!
Bild: Pixelio, © Angelika Lutz
Avers tovöör gifft't lecker Kantüffeln!
Bild: Wikimedia Commons, © Bartek Szumski Poland

Ik heff door noch dükker Molke för holt. Dat wöör denn över denn Winter bröcht. Wi harren ja so ca. 60 Zentner Tüffeln in den Keller. Jeden Dag wöör eenen grooden Pott Tüffeln kååkt. As dat denn in den Summer ringing, dor wöör jeden Dag eenen grooten Koorv afkient.

Dor faat man so af un tau in so'n Nest vun fule Tüffeln. De Handen röken noch een paar Daag na de fulen Tüffeln. Ok Kernseep hülp nix.

Rövenbläder noog!
Fudderrööv. Bild: Wikimedia Commons, © David Vignoni

De Pott nömte sik "Swienspott", de bederen Lüü harren dorför all een "Kartoffeldämpfer". In den Sommer, wenn anner jungen Lüüd baden güngen, müsst ik eerstmal Rövenblatt halen. Jeden Dag een Sack voll. Natürlich harr ik över Dag wat anners tau daun. Avends mußte aver dat Rövenblatt door sien. Dat hülp ja nix, ik müßt ja man los. Ik kann dat ja nu vertellen. Ik harr oftmals bang. Ganz alleen abend's op Feld. De Gedanken in den Kopp. Wat stond doch in de "Freie Erde"? "Sträfling entkommen." "Russischer Soldat in geistiger Umnachtung von der Truppe entfernt."Ganz normal utretten is door ja keen Suldat. Ik segg dat so, as dat weest is.

Vier, fieff Rüvenblader in den Sack. Kopp hoch in de Ümgevung keeken, wat jemand keem. Dann aver ganz schnell na Huus tau.

Dann wörd dat köller. Dat weer November. Dat Schwien wöög ümmer över vier Zentner.

Dat Swien mußte fett sien un ok veel Fleisch hebben. Dat weer wichtig för die Worst tau maken. Ehrlich seggt, ik hebb dat ümmer gern mååkt. Von't Blaut röhren bet hen tau dat Wurst maken. Wat weer dat damals vör een Arbeet!

Door musst ja ok ümmer noch dat Fell op den Rück van dat Schwien extra aftrennt warden. Ik næhm dat ümmer mit und leverte dat av. Drei Mark kreeg ik darför. Kunn ik behollen.

Nich de Schink, man allens annere
Bild: Pixelio, © manny 66

Von dat Schwiensledder heben se dann Stebel för die Suldaten maakt. Damals nömten de sich noch KVP. In blaue Uniformen. Ierst veel later keem de NVA. Dor weer ik selvst dann ok bi togang.

De beiden Achterschinken und anner Fleisch worden erstmals in dat Soltfatt leggt. Blautworst, Leverworst un ok Mettworst kåmen alsbald in den Rook.

Na so söss Week kam denn ok de Schink ut de Saltlaak in den Rook. Jeden Dag ging mien Grootmudder na boven in de Rökerkamer. Man blots met Sagspöön van Bökenholt wöör rökert. Dat weer seeker Ostern, as dat den ersten Schink sünndags op dat schneden Wittbrod geev. Ik had domals giern een un de anner Schneer Wittbrod mehr eeten. Dat güng aver nich. De Schink un ok die Mettworst mussten reiken, bit nie schlacht wöör.

So fein rökerten Schink rüük ik immer noch, wenn ik so'n Bild seih.

Lecker!


2.3.2008


na baven