Op ole Weeg un Brüchen:

De wannernde Grenzsteen
Wannerweg in den Waldhusener Forst

vun Antje Heßler


Se köönt de Fotos per Klick vergröttern.
Trüch kaamt Se denn mit den Zurück-Knoop op de Browser-Symboolliest.


Wannerweg in'n Woold

Ümmer wedder trock mi dat na den Waldhusener Forst. Na den Pöppendörper Ringwall weer ik al mit de Schoolklass wannert. Dor geev dat noch keen Trepp na baven up den Wall. Wi müssen uns an dat Buschwark fasthollen. Mit groot Hallo güng de "Upstieg" los. Up den Wall heff ik de Schoolkinner denn vun de Slawen un den Schutzwall wat vertellt. De Schautafeln geev dat noch nich.


De Wieser an den histoorschen Wannerweg


De Wall vun buten


Pöppendorf


Ja, hier is de Ringwall!


Bargop op den Wall rop geiht dat hüüt licht

Bargdaal güng dat lichter. Aver wenn dat regent harr un de Bodden vun den Wall natt un rutschig weer, setten sik de Göörn ganz eenfach up den Büxenbodden un glitschen hindaal. Denn weer mi ümmer ganz mulmig tomoot. Ik weer froh, wenn ik mit de Kinner wedder enen fasten Weg ünner de Fööt harr.


Henwiestafel to den Ringwall mit Verklaarn. Klick op to'n Vergröttern!

Wenn wi den Ringwall schafft harrn, güng unsen Wannerweg noch wieder na dat Grootsteengraff. Dor kladdern de Göörn up de groten Steen rüm. Kladdern ok in dat Graff. Wenn se allens ankeken harrn, weer de gröttste Fraag jümmer: "Wie hebbt de Minschen vun fröher de groten Steen upstellen kunnt?" Ok an dat Graff geev dat noch keen Schautafel. Ik weer ümmer froh, wenn ik de ganze Horde wedder heel to Huus harr.

Dat weer so in de föfftiger Johrn. Hüütigen Daags is dat en Vergnögen, den archäologischen un naturkundlichen Wannerweg intoslagen. Ik harr mi en gode Wannerkoort besorgt. Över de Knicks lüchen de roden Däcker vun de Pöppendörper Hüüs. Schon vun Wieden kunn man den Ringwall sehn.


De Verfatersche sitt op den Ringwall

An den Upgang vun de Trepp stünn en handsneden Wegwieser. Up den Wall luren Bänke to'n Verpussen. Baben up den Wall staat Schautafeln un man kann nalesen, wi de Minschen hier leevt hebbt!


Henwiestafel to de Siedlung mit Verklaarn. Klick op to'n Vergröttern!

Un so heff ik in de letzten Johrn mit mien Besöök den archäologischen un naturkundlichen Wannerweg in den Waldhusener Forst noch wat genauer kennen lehrt.


Schautafel

In alle Gemöötsrooh kunnen wi de Schautafeln studeern. De Ringwall wöör in't 8. Jahrhunnert vun de slawischen Wagrier as Schutzwall buut. Üm dat Johr 1000 hebbt se em al wedder verlaten. De in den Ringwall funnen Schörren sünd ut de Meern vun de Slawentiet. Up de Schautafel findt man mehr över dat Leven in de dormalige Tied.


As dat Graff 1844 frieleggt woor, hebbt se düssen Steen sett

 

Up den Redder an dat Moor un den Os ut de Iestied vörbi kemen wi denn na dat Grootsteengraff. Dat weer ümmer wedder en Genuss, dat Steengraff antokieken. Goot, dat de Denkmalpleeg vun Lübeck dor en Bank hinstellt harrn! So kunn man dat Graff genau ünnersöken.

In letzten Sommer weer ik mit mien Enkelkinner na dat Hünengraff föhrt. Begeistert kladdern se glieks genauso as dormals mien Schoolkinner up un in dat Graff. Ik heff mi in de Twischentiet up de Bank verpuust. De Sünn luur dörch dat Gebüsch. Dor wöör ik doch wohrhaftig up den enen groten Steen en lütt Waldmuus wies! De knapper an en lütten Kokenkrümel. Seker harr en Besöker den dor extra för de Muus hinleggt.


De Bank achter dat Grootsteengraff

Wi müssen nu wieder. Wi wullen noch de olen Grenzsteen vun den Archäologischen Wannerweg upsöken. De Wannerweg verlöppt nämlich langs den olen Grenzwall, un de Wall weer ut ole Tieden in Afstänn mit Steen markeert. De Steen woorn aver oft verrückt un sünd hüüt meist in Vergetenheit.


De Grenzsteen Nr. 29


Noch en Grenzsteen

Gegen dat Verrücken vun Grenzsteen geev dat fröher blangenbi vele vigeliensche Tricks. De warrt ok op Schautafeln beschreven.


Schautafel to de Grenzsteen mit Verklaarn. Klick op to'n Vergröttern!

De Steens weern dormalen faken an't Wannern, denn natüürlich harrn de twee Grenzpartien en Intress, den Steen to ehrn Gunsten to verrücken. Dorwegen woor mehrst deep ünner den Steen ok noch wat Bestimmtes verbuddelt — Metall, Deertenknaken orr eenfach en anner lütt Steen. Un wenn't denn so schien, dat de Steen verrückt woor, denn kunnst dat bewiesen, wenn du nabuddeln dääst. Denn wöör de Grenznaver Arger kriegen.


Steen Nr. 28

Düt is de wannernde Grenzsteen,
dat Foto stammt vun't archäologische Amt

De Grenzsteen Nr.29 hett mi besünners goot gefulln. De stünn noch up den olen Grenzwall. Up de Schautafel direkt neven den Grenzsteen wöör verkloort, vun wann he dor steiht.

Dree vun de olen Grenzsteen heff ik funnen: Nr. 29, Nr.35 un Nr.33. Bi Nr.33 müss ik de Hölp vun dat archäologische Amt to Hölp nehmen. Se hebbt mi den Lageplan mitschickt. De Steen Nr. 33 weer ümtrocken! Dat Bild vun den Steen dörf ik hier wiesen, hett dat Amt verlööft. Danke!


Rüchsiet vun Steen Nr. 29



na baven